Мерккар йирц1

 МЕРККАР ЙИРЦ1

Гуржияр к1ури шуйи ихь абйири...
«Ккунди вуйк1ан яраб, дарш даккунди?» –
Гъадагъну  шуйза гьамцдар хиялари
дугъривал фунуб вуш аьгъю ап1уз ккунди.

Йиз Аьзиз абайи юк1в абц1ну к1уйи:
«Гъахьунзухъ узухъра аба ад айи...
Думу ярхла йишвариз лихуз гъягърур вуйи...
Усалвал ва куч1ал дябкъну ккунир зат дайи...
Гъилихунза, к1уйи, гъуншйирихъ ямани
Кавказ дагъларин вари терефарихъ хъайи...
Гъидихъундарзуз, к1уйи, гуржит1ан юк1в гъабжир"

Гьамус набши йиз абайин юк1в кабсу думу жил...

Гъи йиз кьисматра дубхьна Кавказ вуйибси дицуб
ккадаури рякъяр йиз аьхю аба гьидицу читин:
Чечен, Ингуш, Кабардин,
Алан, Абхаз, Абазин
ва жара халкьарин Осетин.

Терек нири дурхнин сппариси гъяц1ябхнайи
Дарьял дере хъидипну ягъал гъванар-жяргъларин
вилаятдизди адахъназа йифун барсарин,
уч1ру мурзар заваризди гат1ахьнайи дагъларин.

Гудаури курортдин шибрит1ар ккивнайи
Дерец1ру йифарилан тямягьниинди лигрурин   
улар рукьурадариз  зюргълярихьна Арагвийин –
му вуйи ватан, йиз аба лихури гъахьи дустарин.
   
Гьамус «Юк1в гъабжир» к1ури шулу Ляхлаари…
Дидин мяна аьгъю гъабхьизуз магьа гуржйиригъ
лихурайириз Тифлисдин Цхнети таблиин мюрхяригъ  –
вуйишт1ан му ригъ гъипувал ву муч1у гъяраригъ,
мерккар йирц1руси инсандин айит1 дидиснайи…

Йипай думу халкьдиз «Гамар Джоба» – Хайрар Ишри!
Ккун ап1инай думу халкь, чухсагъул к1ури – «Диди Мадлоба»!