Тенглик бла сюймеклик

Джайгъы кече, гокка чакъгъан кёзюуде
Джылтырайла джулдузла чууакъ кёкде.
Къарт эменге таяныб а олтурама,
Тынгылагъыз, хапарымы мен айтама.

Къайдан чыкъдынг аллыма, ой мёлегим?
Узун чачынг, субай санынг алдады;
Сюймекликни кёрмеген джаш джюрегим,
Ой эриди, сени къатыш кетиб къалды.

Мен термилдим, отда кюйдюм, не этеим?
Мен кесими къалай этиб сюйдюрейим?
Джангы чыкъгъан, чагъа тургъан гоккачыкъгъа;
Адеб, намыс тутхан таулу къызчыкъгъа.

Кёбден бери джандан джаннга халал тенгим,
Аскер къуллугъун баджарыб келген эди:
"Къарнаш, къууан, келтирирге мен тебредим"
Алай айта, ол картынгы берген эди...

"Джылдан артыкъ болад биз сёлешгенли,
Эки джюрек бир-бирине илешгенли.
Сакълаб тургъанд алдамайын, бир ажымсыз,
Сюеме мен ол къызчыкъны бек мардасыз"

Кёргенлей а сени алайда картынгы,
Тыпырдады, ауруду ой джюрегим.
"Аллах толу этсин сени муратынгы,
Насыблы бол, къууанчдан тол, халал тенгим"

Да не этгин, буйрукъ болур Аллахдан:
Кёрген болур, бир ажымсыз, сынаб мени.
Кюйюб кетсем, джерге кирсем да сынаудан,
Ёлюб кетсем да сатмазма мен тенгими!

Бир джанында базманны болса тенглик,
Болса уа ол бир джанында сюймеклик-
Экинчиге биринчини дженгдирмегиз,
Тенглик байлауну джерге атыб теплемегиз!


~ 2006