Рикlиз чими сес ама зи япара-
Булахдаллай, мани лугьуз, лезги руш!
Нур хьиз авай хважамжамдин цавара,
Хуш я заз ви шумал беден, лезги руш!
Ухшар я вун дагъларавай маралдиз,
Мани лугьуз билбилди хьиз, тlарамдиз!
Дадлу, таза сифте ягъай къаламдин
Яр-емиш хьиз, нуш я рикlиз, лезги руш!
Къизилгуьлдиз, ахъа хьайи, ухшар я!
Экуьн ярар ви вилерин нурар я!
Пlузарарни дигмиш хьайи нарар я!
Ваз барабар сад-кьвед ава, лезги руш!
Дагъларани Къавкъазда ви тlвар ава,
Нур къугъуриз кифера шагьвар ава,
Бедендални, тlарам зар-зибар ала.
Ялавд кьунва зун ашкъидин,лезги руш!
Вилери ви есирнай зун, зайифнай,
Гъилелай на яд ганай заз, теклифна.
Беневшавай бахчадиз зун илифнай,
Уьмуьрлух вун мурад я зи, лезги руш!
Лезги са рушаз
© Copyright: Магомед Мирзоев Мирзой, 2017
Свидетельство о публикации №117021606743
Свидетельство о публикации №117021606743
Рецензии