Ичин багълар

Акъатналда къаяр яргъаз,
Куькдавалда ватандин саз,
Амач лугьуз масанра лаз,
Заз ван хьана, ичин багълар!

Гьуьлелай гар агакьна квел -
Кук1рух хьана цуькведив хел,
Квел дамахиз, чархарин пел
Кьакьан хьана, ичин багълар!

Лацу тарар гап1ал-гап1ал,
Зериф шагьвар къугъваз япал,
К1унт1ал алай ч1ижерин к1вал
Залан хьана, ичин багълар!

Ст1ал шаир Сулейман-ба,
Машгьур авур чи хуьр-уба,
Куь сирерни чидай, зурба
Багъман хьана, ичин багълар!

Алахьна жал Самурдин яд
Кьве патахъни, чк1из баяд,
Къизилагьмед ичерин ад
Фарман хьана,ичин багълар?

Хура туна часпар куьгьне,
Ахмиш хьуй ам къуза-гуьне:
Ширин шуьрбет хъвада куьне,
Дарман хьана, ичин багълар!

Атанай, зур кьилел алаз,
Къиргъинар, куьн к1урук кутаз...
Ахварайни тахкурай чаз
Пашман хьана ичин багълар.

Хуьзма чна айгьамдин чар,
Рик1елламаз бубайрин кар:
Ама лезги п1инидин т1вар
"Шурван" хьана, ичин багълар.

Чида, а югъ ала мукьвал:
Чи пайдахдин юкьни-юкьвал
Куь цуьк жеда лацу, я ал
Лишан хьана, ичин багълар!

Гъиле тарат1, кьулак - нажах,
Фашалда куьн тавуй къурвах.
Заз акуна - дустунин тах
Душман хьана, ичин багълар.

Кьунва куьне дере-тепе,
Къацу ч1урал лацу лепе,
Секинрай зун куь са пип1е
Макан хьана, ичин багълар.