Гъанихвалиан ургураза

ГЪАНИХВАЛИАН УРГУРАЗА

Узуз хъялди вузуз Сувайнатдин…
Узгъян жаради гьаз дугъан гъвандин шиъриз
дадайи нивгъар удурзура к1ури дюньяйиъ
сабпи йишв тувди Италияйиъ!?
Узузра азуз гьярфарин гафар…
Дадайин мийибшри, паччагьдинра гарц1лар ап1ру уьру…
Гьа узу гъитархьа, хъат1найи чиркар,
дадайикан дарпиди гьеле гьадму Африкара гъузундар к1ару…
Хъа фтин камур вуйи Кюре-Керим…
Хьуз ужур варит1ан «Малая Земляйин» зиин гьяким…
Гиран мап1ан уву Аьбдурягьим…
Гьяжимураддинсиб саб тики,
ифи хъибк1райиб дарди сикин,
йиз кьулариккра ккайиз, адар к1ури дидин,
язухъ дизигну, ап1рур рягьим…

***

Узуз хъялди вузуз Эльмирайин…
Мирзайикан гъибик1ну к1ури сабпи йишв дагъустандиъ дугъаз тувуз!
Гьаз рябкъюрадар Путиндиз йизра "Замана",
чпи фици адмийириан гъурихьди ифи уч1вубхураш улупурайиб…
Мирзат1ан зина дарин ихь Раджабов Багъир
роман гъибик1ур…(Фуж ву дугъан багахь Манаф… ясана Гьюсейн чювккерин)
ккудушу аьсрарин гьар жюре вахтарин адмийир,
гьитну улихь Жюгьейра,
хъч1юхюри духну кьюд агъзурпи йисариъ т1аур…
Багъиризра – мидал!..
Хъа Рашидлиз – миндал!..
(к1ури шулу: миндали ич1и к1улиъ аъру маар)
Начра дар гьа, жарадарихъди удуч1вуз гьюжатназ,
З. Мягьямадовди «Табасаран багъдиан» идипнайибдиз…
Мидин гьял ужуйи аьгъя  яргълаарин Ибрагьимовдиз…

***

Сарун шлиз фу ва фици пуза… гьаз ккебяхънава Шагь?
Узу яв Велед дарин!?
Анталогияйик йиз саб биц1и Муккуркьана кап1нийиш,
узура шадну кудут1ну ахьидийза, гагь
мугъак жиниди курхьри (курхьнуш беле гьякь гъап1унва думу жугьудрин балик), гагь
тугъан – Пирмягьямаддинна, Гьяжимягьямаддинна, Малламягьямаддин ап1ури тярифар,
хъирчну Гюлбикайихъ йирфар,
лицурайир Буйнакскийиъ Расулин устлин улихь,
ап1ури кефер…
Йиз увукра кайиз хъял…

Узу ап1ураза аьхю хъюлар…
Узузра чавай сабпи йишвар…
Йишв адарзуз, кдисурадарза…
Гъанихвалиан ургураза…

***

Гъавриъ адрахърудариз вуйиз му насигьят...
Гъавриъ айидариз му вуйиз тярифнан гаф...
Йиз "гьяйвнигъ" фурт1мар гъяхьну ккунду гьяракат...
дидин мет1ериъ бит1ру ахьайиз кьац1 саб...