Герар ва бет шеан

ГЕРАР ВА БЕТ–ШЕАН

Герар – Ибрагьимди чан мал-къара уьрхру ч1урар
Ч1еъйиригъ гьит1ибк1найи булагъдин к1ул гъяйи…
Бет-Шеан – паччгьарин ханумариз вуйи гьямамар,
Гъубч1ву мармардаш ккайи кючйиригъ гъяйи.

Герар ч1урар, Негев къураматдин кафарийиъ айи,
Мал-марччлиз шид адабц1ру гъуййири ац1на.
Бет-Шеан шагьур Ярдан нирин чру дерейиъ айи,
Накьишар кайи гъвандин ягъли мурхьлари дабалгна.

Герарин исч1ли тепйиригъ гъяйи тамариск гьарарикк
Исакьдинра кмиди марччарин гереме-берйир ккади а.
Бет–Шеандин дараматарин гъадаргъу гъюрдаригъ
Даманарина хьурхьлари чпиз мукьар ккабалнгу а.

Герариъ Авилемех хандин юк1в улубкьу хпарин намус
Вари халкьариз нумунади аьсрариан-аьсрариз гъябгъюра.
Бет-Шеан абц1ну ади гъахьи пч1у дишагьлийири гьамус
Жил дут1убччвну ккидипу шагьрин ругарикк куш убшвура.

Герар, Герар – ихь абйирин гунгьар, аькьвлиз илт1ик1ру ругар,
Учву гъира гьадмуганси к1ул зади Израилиъ ккат1арццначва!
Бет-Шеан, Шеан, ихь абйирин гунгьар зарб ап1ри гъабхьи назнази
Жара уьлкйирин тамашачйири ухдихъанмина ликриккан ап1урава.

Ч1уру ч1урар ихь кьамдин кьиблайихъ  гизирарси гьамусра хъми
Чпихьна гъюру адмийирин гъянаъ кюгьневалин рюгь за ап1ури.
Накьишарин шагьрикан гъузну имбу цалар шагьидарси гьамусра ими
Аллагьариз икрам ап1рудариз шлуб гьамциб ву к1ури к1ваин алап1ури.