Рубаяр

* * *
Тек кьве сирдай, суал хайи кьвет1ерик,
Кьил акъатдач гьатта гьич са уьтери:
Сад и жув я эхирдал кьван чир тежер,
Сад - цав, кьунвай кук1рух хьана гъетери.

* * *
Гьайбатлу кас, ганват1ани камал ваз,
Вун аквада яшлу хьанвай аял яз:
Гьамиша и сирлу алем амукьда
Ви секинвал къакъудзавай хиял яз.

* * *
Михьи рат1рал мухар к1вахин - агь, илгьамдин ч1ав!
Лацу чарчел къушар к1ват1ин гуз рик1ин ялав.
Гевгьерар нез, ц1акулар таз хъфирай лужар:
Дидедин мез рахазмай кьван хазина гва чав.

* * *
Агь, кьве падни язава хьи, Самур, вуна,
Зи умудар зайзава хьи, Самур, вуна.
"Кукуп1-са хуп1!" - ванер аку чуьллеравай:
Кьеж кьурудаз тайзава хьи, Самур, вуна!

* * *
Чун чал расал авур Худа мерд я кьван,
Зун ви илгьам, зун ви иман, гъед я кьван.
Гатун цик1из лацу хьайи ч1урарлай
Живед тварар хчалзавай къвед я кьван.

* * *
Ашкъи такур рик1 вуч зат1 я - пеш тийир хъвалахъ,
Пич1иди я кагьулдан югъ - жеда зун ч1алахъ.
Ви кун гьим я, ви дун гьим я, жагъун тавур бахт:
Яр к1валеваз, кар гъилеваз, къекъвезма зун вахъ.