Етим Эминан суьретдин вилик

Етим Эминан фотографди ягъай гьакъикъи суьрет акур ч1авуз кхьей шиир.

"Фагъир", "етим" - и гафар мад гъидач хьи за сивиз, Эмин,
Ви рик1ин экв, камалдин нур гьисаба кьан тийиз, Эмин!

"Чи ракъинал хъенар ала!" - язух ч1угваз ава халкьар,
Де лагь вуна, жедани рагъ нахуш хьана ажиз, Эмин?

За ваз са сир ачух ийин: дишегьлийрин сердер я зун,
Чи вил галай ви акунрихъ, ви хъуьруьнихъ милиз, Эмин.

Ингье суьрет! Шаиррин шагь! Амазма зун серсер хьана,
Ви вилера вилер туна, хиял гьарнихъ чк1из, Эмин!

Са булахрай ятар хъвайи, са руквадин эвледар яз,
Кьисмет хьанач кам вегьин ви асул бине к1вализ, Эмин.

Ви к1вач татаб авур сефер - къунши магьал ватан я зи,
Душман я зи кесекни къван, туьгьмет ийиз чилиз, Эмин.

Куьгьне регъвер элкъвез ама, регъвей гъуьрер регъвезама,
Унсу махлукь хквервал туш адалатдин ник1из, Эмин.

Ви иманди, ви игьсанди, жавагьирри, ракъари хьиз,
Хкахь тийиз ишигъ гузва зи илгьамдин рекьиз, Эмин.

Башдиз залай зурба я вун - ви гьуьндуьррив агакьда вуж?!
Яшдиз залай амукьда вун гьамишалугъ гъвеч1из, Эмин.

Чи арада мензил амач, асиррикай легьзе хьанва,
Аян я заз: шегьре хьанва зи рик1яй ви рик1из, Эмин.

Чун суьгьбетдин устадар я, Зулжалалди нуьсрет гана,
Фирдавусда ацукьда чун ихтилатар ийиз, Эмин.