Агь, чилин циф!Акъатна гваз
Гьуьлерин гьайбат:
Гьар галгамдай аквазва заз
Лепедин суфат.
Квадарна на лацу чархар,
Кицик, чумал там.
Гана векьиз назлу сиргъа,
Бичинчидиз - гъам.
Мурк хьиз къанва рехи чигер,
Ц1удхунзава к1вач,
Амма рик1е - вацраэквер,
Амма рик1 зав гвач.
Циф къалин я,зи кам - куьруь
Рекьера дагълух,
Энгелзава лезги гьуьруь
Гьиссери чардух.
Кузват1ани аранда яр
Ракъини къизмиш,
Кьил агъадал кьезил талвар
Таххьурай уьтмиш.
Зун куз хьайи рик1ин гьевес
Серинзава къе,
Уртах лугьур манидин сес
Ширинзава къе.
"Я яр, за ваз гьик1 лагьанай...",
Зун хьанва бизар.
"Хъипи хутар цуькведамаз"
Акъатна йисар.
Чилин циф
© Copyright: Пакизат Фатуллаева, 2017
Свидетельство о публикации №117020510798
Свидетельство о публикации №117020510798
Рецензии