Интернет-рабит1а

Босе, кьурун  бахъун, дихъа  интернет,
Дир заман  ц1об босун бух1уеб бугин!
Т1ут1ун  рай г1одоре телалъул кварал. 
Телефон хъатикьа бортулеб гьеч1ин!...

Хъизам-лъималазул ургъелал тезе,
Гьаб малг1уналъ г1адин малъулеб  гьеч1о.
Эбел-инсул адаб  г1одоб рехизе,
Гьалъ  г1адин куцалеб жен бук1ун гьеч1о.

Гьит1инав, к1удияв бат1алъи гьеч1еб,
Бет1ер сверич1ев чи чандай ватила.
Ц1аларав, г1алимав г1адада хвезе
Замана т1аде щун реххун батила...

Ч1обого г1умру ун паналъараб рак1
Исламалде буссун кант1ун бук1ана.
Т|адеги устарас т1арикъат малъун,
Гьанже  хвасарлъанин хьулцин бук1ана...

Какилъ бак1алдаги цебе гьабги лъун,
Гьабулеб г1ибадат щвалде щвеладай.
Шагьадат бит1изе завал щварабго,
Гьалде т1адги къулун  мекъи ккогеги!

Гьадиг1ан  к1удияб  зулму  батич1о,
Дингун исламалъе квалквал гьабулеб.
Гьалдасан   макруяб жо  бижиладай,
Интернет-рабит1а ц1ар жиндий щвараб...

Носол х1исаб буго интернеталъул,
Пайда гьеч1ебщинаб г1емер хъирщани,
Нахърател гьеч1еб къо цебе батулеб...
Рак1 ч1ун т1аде босун т1амчал  регани, 
Г1акълу камилаца пайда босулеб.

ДУДЕ нижер ах1и, Х1АЛИМАВ АЛЛАГЬ!
Гьеч1о нижее  бак1 т1ок1аб квер ч1вазе!
Заг1ифал лагъзазул к1арчанал  рак1ал,
Рек1ел зикруялда  ч1езе гьаризе!...