Шаир Сулейман

Москва.Вирисоюздин писателрин съезд.
Уьтквемдиз са дагъвиди лугьузва "есть!"
Трибунадихъ физва кьуьзуь са итим-
Кушкушзава залди: "Шаир яни им?"

Трибунадихъай залдиз килигзава шаир,
Гьар миллетдин хизандиз вични тир маил.
Хут1унна бармак, п1узарар гьа юзазва,
Залда шумуд жуьредин гьиссер къугъвазва.

Бирдан хкажзава цавуз шаирди т1уб-
Мани хьиз залдиз чик1изва шиирар хуп1.
Суьгьуьрда турбур хьиз, къузияр хьиз къванцин,
Суст я инсанар селдик шииррин ванцин.

Дикъетдивди шаирдиз килигзава сад,
Лезги ч1ала тийижир гана адаз дад.
Суст хьанвай вилерикай карагзава грек,
Вич буьркьуь яз шиирар теснифай фелек.

Амма вилик акъвазна рахазва лезги,
Я къелем авач, я чар - шиир я гуьзгуь.
Рик1из дар я шаирдин хурудин кьефес,
Физва яд хьиз булахдин илгьамдин гьевес.

Максим Горький къарагъна, квайди хьиз тахсир:
"Багъишламиш, кьуьзуь кас, на гана таъсир,
Къад лагьай асирди ц1ийиз хана Гомер,
Жавагьирар теснифдай шаиррин сердер".

Москва.Вирисоюздин писателрин съезд.
Уьтквемдиз мад дагъвиди лугьузва "есть!"
Залдиз эвич1зава шаир  Сулейман -
Кушкушзава залди:"Шаир  Сулейман".