Наьначе-ГIалгIайче. илли

Эзара шерашка
      вахара тай лусташ,
Ширача замашка
      сердалон никъ бусташ,
ХьабоагIа хьо, Даймохк,
      тха беркат дебадеш,
Эшадеш шийла дохк,
      гIозалле Iалашъеш.

(тIехьоалар)
Яхийла, яхийла деладеш ноахалла,
Яхийла, яхийла ца хадаш хозалла…
Яхийла, яхийла сий дола Наьначе!
Яхийла, екийла хьамсара ГIалгIайче!

Мисара мехкара
      хьай лараш ца йойташ,
Дзурдзукий ханара
     йоакхонаш хьалкхоабаш,
Хьадоагlа хьо, тха къам,
        харцонна ка ца луш,
Лестабеш кура ткъам -
       халонна къар ца луш.

(тlехьоалар)
Яхийла, яхийла деладеш ноахалла,
Яхийла, яхийла ца хадаш хозалла...
Яхийла, яхийла сий дола Наьначе!
Яхийла, екийла хьамсара Гlалгlайче!

Кавказа фух йолаш,
      цунца сий лакхдолаш,
Кхоллачун бух болаш,
      супачун зем болаш,
Ях хоза, хьо Даьхе,
      вахара чам гойташ,
Сийрдача безаман
      хьай бола мах хойташ.

 (тIехьоалар)
Яхийла, яхийла деладеш ноахалла,
Яхийла, яхийла ца хадаш хозалла…
Яхийла, яхийла сий дола Наьначе!
Яхийла, екийла хьамсара ГIалгIайче!

Башлоамца са тассар
      машарца ва долаш,
Маьт-лоамца из дожар
      сатемца ва долаш,
Дахаш да тхо, Даьхе,
      Iа денна деладеш,
Дуненна фаьра кад
      хьа духьа текъабеш.

(тIехьоалар)
Яхийла, яхийла деладеш ноахалла,
Яхийла, яхийла ца хадаш хозалла…
Яхийла, яхийла сий дола Наьначе!
Яхийла, екийла хьамсара ГIалгIайче!

25-26.01.17.

(Илли яздаьд ГIалгIай Республика юха кхелла 25 шу дизара хетадаь)