Зул...Лап яргъариз акъатнава къе зи гад...
Югъ къандавай марф алайбур я йикъар ...
Вучиз гила патав къвезва икьван фад,
Дурнайрин ц1иргъ хьиз рекьевай, хиялар?
Гатфарни гад завай жедач элкъуьриз...
Адет тирвал физвай фана дунъя я -
Зулун юкьвал гъайи зун, гел къекъуьриз,
Т1ебиат! ви к1валахар вуч зурба я!
Вун къведа, зул, дамах ийиз бегьердал,
Гагь рагъ алаз, гагь - вегьена цифед шарф.
Зуни ава уьмуьрзавай шегьерда,
К1евиз кьуна ви гъил - вилел алаз марф
Зул, ви вилик жеда завайни дамах:
Зи умудрин кьве лув ава - кьве хва захъ
Зун ч1алахъ я: жеда абур зи даях -
Хьана тухумдин дестекдик кьве запахъ.
Ингье, зулун акъвазнава зун юкьвал,
Амат1ани руьгь гатфарин береда...
Амач вахтар - кьуьдни къведа гваз кавал,
Живед ц1верек1в - зи ч1арарал вегьеда.
Фото из Интернета
Лап яргъариз акъатнава къе зи гад...
© Copyright: Гасанова Гюзеля, 2017
Свидетельство о публикации №117012300504
Свидетельство о публикации №117012300504
Рецензии