КЬАТ1АР КЬАТ1АРДИ ВУЙИ Ц1АРАР

КЬАТ1АР КЬАТ1АРДИ ВУЙИ БИЦ1И Ц1АРАР

Дустарихъди деънайи бахтавар,
Дустар узуз адарзуз.
Йипа, дурар уьрхюз рягьятди вуйк1ан?
Дурариз узу яраб гъагъи шуйк1ан?

***

Гъуллугъ ккубкьнайи гъуллугъчи,
Узуз гъуллугъ туврур адар.
Тувишра дурар узккан инжиг хьиди
Узу чпиз туври даршиш ужуди.

***

Сариз дилигну варидари «ав» к1уруган
Узу йиз к1ваант1ан «ваъ» к1ури шулза.
«Ав» гъапидар ккахъру гъагънакк
Ккахъну ч1арк1уз ахмакъ духьнадарза.

*** 

Узу гъазанмиш ап1ру йиз азадвал
Дурарин вахтназ вуйи шадвалт1ан зина вуйиз.
Сундукь абц1ну айи вари девлетт1ан
Марцц дап1найи йиз юк1в хъа багьа вуйиз.

***

Йиз улихь рукьар ккиври, рякъяр хъяркьри шулу
Хиял дап1ну узу чпиз мют1югъ ап1урча к1ури.
Гашу йик1урушра, зийнар шулушра, аьйибнаъ итрушра
Хъа узуз хът1якьюз ккунидар дурарин юк1вар шулу.

***

Дурарин кьастар узу пуч ап1уб вуш,
Йиз метлеб дурар узуси шад ап1уб ву.
Дурарин ниятар узу кац1ну асккан ап1уб вуш,
Йиз заанвал дурарин жан марцц ап1уб ву.

***

Нашива ккунир?..
Узуз уву душман дарзуз.
Гьап1дива ккунир?..
Яв душманвал узуз ц1а вузуз!
Диди убгиди яв гъян...
Рюкъ багъдизди гат1абхьидихьа.
Ктубч1ву кюкю...
Яв мухрихъ хъивдихьа.