Хкведа зун!

«Ахвар такуна квар хадач» -
лезги халкьдин мисал.
      
       I
Гьакъикъат туш, ахварай
Атанвалда Шарвили.
Суван хуьруьн кьуьзекдив
Раханвалда Шарвили:

-Зурзадайвал к1вачик чил,
Садвилелди кьуна зил.
Эвера гьа жуьреда,
Хкведа зун, хкведа!

Хкведа зун, хкведа!
Лезги чилел элкъведа.
Фида Куьре-Къубадиз,
Гьар са хуьруьз убадиз,
Самурдизни Кьвевардиз,
Кьвепеледиз, Кц1ардиз…
Гьар жуьредин хкетар,
Ихтилатар-суьгьбетар
Ван къвезва зи япариз,
Гьикьван яб гун гафариз?
Зи кьве вилиз акурай,
Зун жув жувахъ ягъурай.
Дере-тепе к1вачикда
Амат1а зун килигда:
Уьтквемвал чи касарин,
Вафалувал свасарин,
Ягьни намус кумат1а,
Ч1ехи-гъвеч1и чизмат1а.
Хатур-гьуьрмет арада
Килигда зун амат1а.
Пагьливанар, алимар,
Итимвал квай гьакимар.
Зуьрнедин ван мелерал,
Ашукь алай мехъерар.
Ахъайна кьве лув-кьве гъил,
ХъийизматIа лезги кьуьл.
Чи рушари, вахари,
Тешпигь авай махариз,
Яргундални Миграгъа
Хразмат1а сумахар.
Испиквидин къапарин,
Кар амат1а туп1арин,
К1иривиди гьазурай
Ахквадат1а гапурар.
Леги халкьдин гьерекат,
Хайи чилин берекат:
Ичин багълар, бахчаяр,
Къуьлуьв ац1ай талаяр,
Къурушарин суьруьяр
Такунайт1а кьери яз.
Гьар са нямет булдаказ
Аквадат1а яраб заз?
Хъийизмат1а гузанар
Тух жедайвал хзанар,
Чул чизмат1а Хъукьвариз,
Штулвийриз къахариз.
Цк1ен, гумба, афарни
Гельхенвийриз камбарни,
Манкъулида, Хъуьлуьт1а
Хъийизмат1а исит1а?…


              II
Ажугъ гьатда зи чанда
Такурай заз Ватандай
Халкьдин иви хъвайибур,
Чиркедин тум цайибур,
Чалкечирар-барчияр,
Хаинарни къучияр,
Cадвал квадрай нибгетар
Ч1урайбур чи адетар.
Чуьруькдик кьил кувайбур,
Гьарамда вил авайбур,
Баж дагайбур сувариз,
Далу гайбур гъуцариз,
Мердвал, лезги намусни
Кумачирбур са к1усни,
Чеб чан алай мейитар,
Руьгь мурсу кьур баятар,
Тум гекъуьрдай тартаяр,
Яд кужумдай шалтаяр.
Зун хквезди чилиз фий,
К1ан кувачир гьуьлуьз фий.
Эгена геж авурт1а,
За лагьайвал тавурт1а,
Гьар са хуьре кьве гьамбал
Къекъуьрда за к1валба-к1вал.
Кьаз кьамалай акъудда,
Зинданра чан хкудда.
Хкатайбур элдикай,
Къутар жедач селдикай.
Тахьана хьуй чахъ садвал,
Ахквадач чаз азадвал.
Ик1 амукьич зи Ватан
Жеда даим са патан…
Гьахъвал авай бинеда
Пачагьлугъдиз элкъведа.

Куьн уях хьай береда
Хкведа зун, хкведа!

      III
Акъуднава за къарар:
Вахтуналди зи крар
Авун патал тамамар
Ихтибарда Имамал' !!!

__________________

' – Имам Яралиев