Куьлуь марф

Чан зи рикI! И чарчин винел кьуранвай стIалрин гелер акурлахъди, ваз акI жемир хьи, за и чар шехьиз-шехьиз кхьенва. Ваъ, зун шехьзавач. Ви рикIел аламатIа, хуьруьн кикек чи гуьруьшдин чка авай. Са юкъуз чун, сад-садаз акун патал цIийиз-цIийиз гьанал атанвай хьи, куьлуьдаказ марф къваз гатIуннай. За: «Ваз мекьи жеда, пакамалди чун ччара жен» лагьанайтIани, вуна: « Ваъ, заз куьлуь марф гзаф хуш я» лагьанай. Са герендилай ви чандик мекьивилин фул акатнай. За вун къужахламишна, жуван ашкъидивди ацIай теменар гуналди, зи рикIикай цIай ганай ваз. Вахъ мад мекьивиликай эсер амачир. Чна кьведани фикирзавай хьи, вуч хъсан тир, куьлуь марф аваз... Куьлуь марфадикай жувазни хуш къвез, адакай шиирар туькIуьриз авалнай за. Гьар сеферда куьлуь марф къвадамаз, чун кьведни чи гуьруьшдин чкадал фидай. Гатфар, гад, зул, кьуьд талгьана. Гзаф хушбахт тир зун. Йикъарикай са юкъуз вун аниз атаначир. Са гьафтени алатна, варцарни алатна, марфарни къвана, гьикьван за ви рекьер хвенайтIани, мад вун аниз хтаначир. Вуна заз хабар ракъурнай хьи, чиди гьанал кьван тир, гьадални куьтягь хьана. Себеб чириз кIан хьанай заз. Вавай жаваб гуз хьаначир. -Марфадивай жузуз, лагьанай вуна заз.
Гила гьар куьлуь марф къвадамаз, чи гуьруьшдин чкадал фена, жуван чин, марф къвазвай цавухъ элкъуьрна, чун сад-садавай къакъатунин себеб чириз кIанзава заз. Марфадивайни заз са жаваб гуз жезвач. Ингье, мад куьлуь марф къвазва. Исятда чи гуьруьшдин чкадилай, кьилелай кIвачерал кьван пIертIех хьана, куьцIенваз хтанва зун. Зи чIарарикай, за ваз кхьизвай чарчин винел, ваз пара кIанзавай гьа куьлуь марфадин стIалар кIвахзава. И чарчи кужумнавай марфадин стIалар ваз ракъурзава за. Вучиз лагьайтIа, са вахтара ваз куьлуь марф гзаф, лапни гзаф кIандай....
           (Азербайджан ч1алай элкъуьрайди ЮСИФ ХАЛИЛОВ)