Самур вацi

Дагъларин дерт, фена чиляй чилериз,
Хажалатдин рех янава кьилериз.
Акур чIавуз, ишел къвезва вилериз,
Вун дагъларин накъвар яни, Самур вацI?

Вахъ виликан такьат амач авахьдай,
Вахтар фена, кьерерилай алахьдай.
Са ширин ван текъвез, рикIик акахьдай,
Хажалатдин йикъар яни, Самур вацI?

Дагълар чибур, чеб живерин гьамбар тир,
Дегь девиррин тарихрикай хабар тир.
Лезги халкьдал ашукь хьанвай къумбар тир,
РикIел хьанвай къабар яни, Самур вацI?

Самурдин там тIебиатдин багъиш тир,
Лезги чилел чIугунвай пак нехиш тир.
Халкьдин патай и кьадардин къаргъиш тир,
Лугьунрикай хабар яни, Самур вацI?

Лезги халкь хьиз, кьве пай хьана, есир я.
Им гьахъсуз тир кьвед лугьудай асир я.
Лагь кван халкьдин, Самур цин вуч тахсир я?
Бишибур ви япар яни, Самур вацI?

Чилерик квай кьеж хкудиз тамарин,
Яйлах жезва, цIингав ядай ламарин.
Сажидинай акъатзавай гумарин,
ЦIай худдавай гурмар яни, Самур вацI?