Вавилонская башня

Вавилондин ц1унт*

Чилел халкьар халкь авуна Халикьди,
Гьайванарни гьашаратар, ничхирар…
Сир Халикьдив гва – эвелар, эхирар,
Элкъуьрзавай Вахтунин чарх виликди.

Халкь хьайиди чинакъвазна Халикьдин –
Вич цаварив агакьариз к1ан хьана.
К1ан я вичин ар Халикьдиз ван хьана
Вегьезвайдаз варлувилиз кьиллихъди.

Вара* патал терг ийизва инсанар,
Зара* гъизва Халикьдин нур-бегьердиз.
Шаррдин* къадри мус хьайид я нуьквердиз,
Ният авай – къачун вири игьсанар?

Аргац*, айра* Намрут1-шаррдихъ* бул авай,
Багълар, ник1ер, сан авачир нехирар…
Гьич к1ат1ара агакь тийир техилар…
Тух тежедай адахъ невсни т1ул авай.

– И чилерал захъ акъаждай вуж ава! –
Цавар чилик кук1урда за, Намурут1а!
Зи лук1ари заз Гъуц-Намрут1 лугьуда,
Лап Халикьдихъ акъаждай заз гуж ава!

Ц1унт эцигда – Ирид-Цавук хк1адай,
Халикьдални зи, Намрут1ан, гъил жеда –
Зи Бабилун* там алемдин кьил жеда,
Са т1ем. Са ч1ал. – макьда вири акьада.

Вичин ласриз эмир гана Намрут1а:
– Гьар са халкьди ч1алан асул къван гъурай,
Ц1унт хкажиз заз куьмекрин кван гъурай,
Алем жеда зи са гъутун паруда!

Къвезва халкьар, акьалт1 тийир ц1иргъер хьиз,
Къванер гьялиз агакьзавач уст1арар.
Кьил акъатич шарр-Намрут1ан къастарай…
Амма халкьар к1валахдик ква цеквер хьиз.

Сад телеф жез, кьвед хквезва тепедал,
Къирмаж гвайда кьабулич к1ус муьк1уьвал:
Къирмажди гьекь, галай туькьуьл уьк1уьвал,
Кьуьрурзава далудални кекедал…

Ингье ц1унтни агакьзава цаварихъ,
Лап ц1айди хьиз кузва гатун ракъини.
Кьас фуъ, хуп1 йад я гьар йикъан гьакъини,
Иниз лув гуз т1ем амукьич луварихъ.

Садлагьана цавар к1евна цифери,
Къумрум галаз гуя чархар рахана.
Хьелер хьтин ц1айлапанар къугъвана,
Чайгъундин гар кьунва ажеб хъилери.

Вуч мусиббат! Эл тухузва пешер хьиз!
Къванцин хара гарун хура чк1ана.
Инсанрин ц1урдай гьава ац1ана,
Бул мейитар кьуд патава лешер хьиз.

Куьтягь хьана Намрут1-шаррдин умудар,
Лап Халикьдихъ бягьс ч1угунин къаст хьайи.
Гьа няс йикъа, инсанриз яс гъайи,
Зи ч1алан диб хвена, тергна намрут1ар.

Халкьар чара, ч1алар чара бинедай
Ният аваз халкь авунай Халикьди.
Ч1ал, миллет хуьн пак буржи я гьакъикъи,
Руьгьдин девлет я ч1ал, эвез тежедай.

24.11.1980.

Вавилондин ц1унт – вавилонская башня.
Вара – девлет.
Зара – зарар, пучвал.
Аргац – гимиш.
Айра – къизил.
Намрут1– дегь ч1авара Вавилондин пачагь, лап варлу кас.
Шарр пачагь.
Бабилун – Вавилон.