Уьмуьр физвани лезги руш
Шиирин юкьва.
Жагъур жезван вавай гафар
Фикирриз, мукьва.
Кхьизвани гьиссер квахьай
Жегьил вахтарин,
К1анзавани ваз инсан жез
Ч1ехи бахтарин.
Ухшар яни вин к1енивал
Халкьдин махариз.
Я дахьайт1а элкъвенвани
Кьуру гафариз.
Жагъур жезван руьгьдиз чка
И ч1ехи чилел.
Акъудзаван дахьайт1а вахт
Нагъв алаз вилел.
Чира жуваз гапурди хьиз
Кьат1из гьахъсузвал.
Секинариз рик1ин гьалар
Акьалтайла звал.
Виниз хкаж жедай ч1авуз
К1евиз яхъ рагар.
Уьтквембур хьуй на туьк1уьрай
Гурарин к1арар.
Жув физавай рекьерани
Чир хьухь ,цуьквер цаз
Элкъвена мад хуькведайла
Регьят жеда ваз.
Вин бахтунин куьлегар на
Акъаймир гъиляй.
Ягъалмиш жез фейит1а вахт
Аватда виляй.
И дуьньяда ,т1ебиатдин
Крар ,ибур я.
Гьа и къайда авурт1а на
Бахтар вибур я.
Са лезги рушаз
© Copyright: Гулья Мисриханова, 2016
Свидетельство о публикации №116111511802
Свидетельство о публикации №116111511802
Рецензии