Лезги чIални, нек хьиз хъвайи дидедин,
Кьисмет хьана Лезгистан яз – Ватан яз!
Багъдат ухшар вилаятни Куьредин,
Самур, Къуба халкьарни са хизан яз.
Лезги гафар – лайлаяр яз, кьепIина,
Заз ван хьанай келимайрин сирер яз.
Лезги чIалал зав зи диде луькIуьна,
Чилихъ галаз рагъ рахазвай тегьер яз.
Дидедин чIал – вун зи рикI я, вун зи чан,
Вун галачиз дуьньяни заз ичIи я.
Ви рекье гуз гьазур я зун хвейи чан,
Вун галачиз, рагъ авай югъ мичIи я.
Амай вири чIаларни заз масан я,
Алатайла, зи дидедин чIалалай.
Зун дидедин чIалал ашукь инсан я,
Лайлайлин ван сифте хьайи чIавалай!
Чна чи чIал, чун хуьзва чи чIалани,
Дидедин чIал чирун акьван зиллет туш.
Лезги яз, чIал тийижир кас авани?
АватIа, ам халис лезги миллет туш.
Лезги чiал
© Copyright: Сажидин Саидгасанов 4, 2016
Свидетельство о публикации №116102209571
Свидетельство о публикации №116102209571
Рецензии