Аст1ил сулеймандиз

                АСТIИЛ СУЛЕЙМАНДИЗ
                (Шикил)

Фици вуйи, Сулейман, касибвалиъ?
ГьапIнийвуз кентхудйири, маллайин гъюнихъан гъибисган?
Ари гьаци шулу гьа, дуст кас, диндин гъурдаъ дючIюбкьнайи ватандиъ!
Тавра кади фукьан гъидицнийва?
Шли, гашу йикIурайириз, ипнийи душвазди уьлин кьацI?
Гьар гъяркъю кавхайи фици йивуйвуз юкIв удубтIру кьацI?
Гъивну кьюб маш: йигъну - саб, хъа йишвну - жараб, Рабби йишвандин
       даруганси Агъа, кьючIаъ ади аьраб гьярфарин мутму, увура апIури кIажар,
       касибарик курхьри, хъа девлетлуйирин ккажакури, апIури тIягьрат, Раббийииз
       апIури агьрар, гьякимариз алахьури афрар, "магьа узу учвуз аллагь" кIури, 
       гьаз гъидицундайва бейнава, Сулейман АстIларин?!
Гьюкуматдин законар хъаъра документариъ ва дурар проверка апIура дюзди дидикIнаш.
Эгер дарди гъабшиш, чпиз гаф дяргъруси дюз алауз гъитру гъитIу пларин.
Адми гьясби ккимдар.
Зиълан гьюкумди деебту кепек гьардихьна гъурубкьнуш аьгъю апIдар,
       гъапIу ляхнариз лигурдар; ляхнихъди документ сабси гъюруш ахтармиш апIдар; 
       лигуру гъазниъ аш бакьлукьар; устлариин дивнаш "лиза кIулар";
       гьямамариъ ккабалгнаш кьяппйир, газет-журналариъ - чпин адрар;
       телевизориан чпин "гъюдли" ва "намуслу" сфатар улупиш - магьа, дурарин
       гьуркIна вари метлебар!
"Гьамци даршул! Агъа а Аьршариъ! Дугъу: "Увуз уву фици ккундуш, ккун апIин 
       гьатмунурра гьаци"- дупна гъапиш, увкан ктаиди халкьдин душман, жямаьтдин
       "кIару битI", ватан масу туврур, дин батIул апIурайи кяфир.
УтIуккидиву ляхниан, гъипдиву кючйиригъ: "гьич ктрубкIри мугъаз ригъ,
       гъяхъриву гьатму гъяригъ, алдабхъну гъюнариин али "дигъ""!
Хъа Мягьмудкан гьапIнийи иблисди?
Хъа Каиндикан гьапIнийи, хъа..., хъа - Иовдикан?
Гьеле кIваин апIин Пилатдикан гьапIнийиш - Ягь'яйикан ва  Ягьудайикан!
Гьа, Сулейман, яв чанта ча, кабхъну хъюгъза, гъюлягъ гъючIвза уч апIури
       ягь-намус, аькьюл-гъир'ят, агу лигуза, ипуз шулуш дидкан фукIа-мукIа 
       душваъ.
Бихъдарвуз кIурайва? - рази вуза.
ГьапIру?
Дици вуш, увуз инкьилабси, узуз - жилариинна гъюра Иса, Чав халкь гъапIу
       инсанарилан алдабгъуз кьиса!
Нигь гъапIдари пайгъамбар Муса, кьабул апIур кIурайва  варидарин Агъа Аллагь Иса?
Дугъаз ухьу вуйиган масан, дурарин кIарбариккан цIа гъябгъюру.
Гьадму цIигъ хьиди дурар гьаргандиз!
Магьа, гьаму гафар вуйиз увуз кIурудар, мидкан хабар адру, АстIларин Сулейман.