Журум

ЖУРУМ

Шлиз аьгъя метро Москвайиъ?
Дидин гюзчи гьяйбатнакан?
Уьрхру инсанар гьавайиъ,
Умбрари жилиз гъахруган!

Умбрар чиб-чпилан гъягърудар!
Бегьемдариз йишв алидар!
Душв'ин ришвури ву ккундар!
Аьламатар ву кайидар!

Москвайиз гьаз гъягъюза зу?
Ав, йиз ляхнилан гьаунзу.
Мукьмар йивру алатарин,
Заводдиз ич мяишатдин.

Зегьмет йигъар душну магьа,
Хьадукран шад машквар дуфна!
Дишагьлийирин хьуз багьа,
Март такабурвали кабхьна!

Жиликк ккайи дараматар,
Йиз улариккан ктIуршвнийи.
Гъийин йигъра вуди машквар,
Дурариз сартIан рякъдайи.

Чист рабхура жиликк "музей",
Мукьмари усрарин биши!
Зуси учву гъахьнийиш, гьей!
Гьергрийчва чIимрарси диши.

ЮкIв жвуван мукьмарихъ ширин,
Язухъи ришси ибшурин?!
Ав, гьамциб гьялнаъ ахъназа,
Ебхьуз ккунди фу-вуш таза.

Эскалатордиъ эъназа,
Жил'инна улдучIвуз ккунди.
Радиойихъан  гъибисза:
"Устад" мяъли пиди кIури.

Табасарандин успагьи,
Хуш сесер атIагу магьи.
Дидхьан ярхла хьуз даккунди,
КIулиз саб хиял гъафнийиз.

Ергну эсколатордилан,
Уз кайи сундкьиин ярхи,
Громкоговорительдихъан
Ликар хъдиржза хяртIхъанси.

Адмийир узуз лигури,
Мюгьталди мурмрар апIуйи.
Аьшкь кьапIу гьенг ккудубкIури,
Милицйир дуфну хъуркьуйи.

Сундкьилан алдагъну зу,
Идарайиз хъади гъурхзу.
Йиз жвув'вал ахтармиш дапIну,
ЙицIуб манат журум гъапIу.

"Аьдат чIур гъапIунва, - кIури, -
Мициб тарслувал дарибшри!
ГъапIиш заан журумвал хьибди!"
Жаваб тувза даршуз: "Ибшри!"

Му арайиъ манат йицIуб,
Узуз фу ву, гьязур вуза,
Вушра йиз мажник бицIиб,
Тувуз варж гьам гьялнаъ кказа.

Гьюжатар артухъ дарапIди,
Идара дипунза шадди.
Машквар йигъан нуш машкварси
Гъабхьнийиз беден гаргарси.

Гьамциб кьувват тувру мукьми!
Жан затра хьуз гъитдар уьркъми.
Гьаддиз тIирхдарин гъушар,
Кайиган чпик гьенгар ухшар?!
Чвул - 83