Гюрюшмиш гъахьунза

ГЮРЮШМИШ ГЪАХЬУНЗА

Пузучвуз, узухъ хъпехъурайи рафтарар,
Гьякьлу гьядисйир сар йиздихъди гъашидар.
Сабпи ражари учу чиб-чпиз гъяркъиган,
Дагълу гъулаъ, дустарихъди: сар йиз, сар чан.

Гьич сабдиканра вижна ктарди гъахьнийза,
Багахь, мурччаъ дийигънайирихьна, кIул ис.
Дишла: "узу думутIан ягъалди вуйза" -
Наънан вуш дугъан жандикан кIулиз гъафниз.

Ккилигурайза ис духьну уччву машназ,
Лигури гьарсабдиз: гарцIлариз, улариз.
КIул тинди илбицнийи чру ягълухъ али,
Начлу машниин эргнайи хилар алди.

Ич дустар: йиз - классдиъ бай, гьарсаб аьгъ'яндар.
Фукьан гъапиш, гьадмукьан думуган фурслур.
Дугъанна - халайин швушв, урхрур халачйир,
УкIу завуъ уьрхну юрушну ацIнайир!

АпIурайи чиб-чпихъди зиълан гафар,
Уьмрарикан, фици гьаъруш ярхи йигъар.
Хъа чпин фикир дарарин учухьна вуйи,
Аьхю хулан кьялаъ зарб элегурайи.

МютIюгъ думу узуз гьич шлуганси дайи.
Сюгьбатар кIури цIийи кIултIан алжагъишра.
Гьамусра узукди лижар апIурайи...
Я гъира думу дицир дар фу гъапишра.

Узуз Гьюри фици гъахьнийкIана гьамцир:
Саризра даягъ дарур, цюмгъялси ижмир!
Узу фици аьгь апIурайкIан мицир:
Узукк ккудубкьнайи шибритI кьючал вуйир.

"Гьаз вуш, Жинир, думу яв увуз ккундувуз,
Жарар кьит вуян увуз вилаятариъ?"
ГьапIза узу, Аллагьди туву пай вузуз,
Узу гьапIза, дугъаз туву узу вуъ!"

"Гьамус аьгъю гъабшичуз яв цIару фикир!
ВуйиштIан даккунди вуйи гъизгъин ляхнар.
Увуз му Гьюри бегелмиш дар: хъубзуз - шид!
Гьамцир най-най уву гьаз вува я, Давид?"

"Эй, учву, аьяндрар: завар, ригъар хядар,
Фукьан успагьиди вучвуз дугъан уьмур?
Ичв вуча, гьюрйир, имбударси саб кьадар,
Хъа мюгьюббатвалиан ичвтIан ву йизур!"
I983й.