АД

АД

Мархьар ахьуз - ригъар, дагълар, ахсрар
Гьунарар хъайидар ттевуз даршлу.
Гьарубдин хусуси буржйир, тахсрар
Рагъура саб-сабдиз дугъри аьр шлу.

Мархьарин, ригъдин, дагълар-ахсрарин,
Чпин аднукьан адар апIурадар.
Гьякь-гьисаб агури, тахсрарин
ГъалатIнакан гъалмагъал ктапIурадар.

Ад хъа дурарихъ фукьан ккушра ад!
Хътруб хъапIри ваъ, хъа чан якьинтIануб.
Дурарихъан хай дару гъюрушра дад,
Чан табиаьтдиз ву гьякьинтIануб.

Инсанарра дарин дидин саб пай -
Хътру ад хъайи, ктру тахсрар кирчнайи?
Гьаз хьиди гьацдар Намусвализ тай -
Жвув бадали имбудар гьирчнайи.

Иблисари ад гъазанмиш дапIна,
Гьаддин табии метлеб аьгъдарди.
Дугърийиз дидин дад гьярам дапIна,
Саб чара хьуз индад гъибтнадарди.

Гъиринигъхъантина филадизкьан
Гьамци аьгь апIуз ккашул жям'аьтар?
Фагьум илтIибкIру ад кебгъяйизкьан
Гъучйирин кам хьидар мясляаьтар.

Ад хъа ихь Эйсийихъ; инсанарихъ -
Лигай шли фици гъазанмиш дапIнаш!
Хъугъвал хъади гъубзурин сасдарихъ,
Гьунарар хътарди фурсар апIураш!