Сабур

САБУР

"Сабур апIин, дуст, сабур.
Хъибшну ккундуш увухъ абур.
Сабур апIин кас, сабур,
Духьну ккундарш биябур".

КIуруган узуз гьамци
Беден шулизки гьаци:
Йиз узу вардиз дарцци
Шулайиганси марцци.

Якас апIуру фукьан
Аьгь, сабур? Гъи кьан ву кьан!
Гъабхьиб дар пуч'вал мукьан,
Зуз гьам ражну рябкърубкьан.

УчIвуггурамиди мюлхъяр
ГьютIюхюрайиз хъюхъяр.
Вахт ву улупуз дюрхъяр,
МучIушну апIуз бяхъяр.

Фукьан къюргърухъа дурар -
Жегьеннемдиз хас гурдар.
Саб гаф дарди хъиржвну хилар
АтIуз унтIаъ зур гъурдар!

Гьамус фикир апIинай,
Гьаз йивуза йиз лай-лай,
Ушв алидарин гьарай
Шул кIури бакар гьуррай?

Дурарин дидикк ккапIна
Гьярис тIулар ва футна.
Улупури чпи, думгьа,
Зиълан гьякь намус дутна.

Сабур апIин кIурчва зуз,
Филадиз гьамци гъузуз?
Думу ккадайиш мина гъюз,
Хьибдайи узхьан ккюбгъюз.

Кьяляхъ хътабкруб шулдар шак,
Я сабурну йивдар гьяк.
Саб хилди шулхьа гьялак
Шак кабхьайиз ихь кьялак.

Дюз гъапиш, кабхьна думу -
Гъуллугъчйириз ккарагбу,
Дурар - агъйир, аьгь апIбу
Аьжлиз ккумбу вахт фу ву?

Сабур филадиз яраб!
Тямягь хъмиди гъургнич баб...
Бихъдар сану хъял жараб
Ихь уьмур апIру кабаб.

Накь гучIар ккаъруб - дафтар.
Му девриъ - гьяким-кафтар -
ГьадатIура ал бафтар
Гьюрмат айирси рафтар.

Сабур, жан Рашид, сабур,
Хъибшну ккундуш увухъ абур!
Сабур, Рашид жан, сабур,
Духьну ккундарш биябур!