ЧАРА
Таза кьисмат абгуз ккундузуз
Жараб имдар сарун чара.
Ккарагури хилар заргуз -
Чара имдар узуз жара.
Мягьрум дапIназуз кIван шадвал
Убгурайи гъян ктIубшвуз шлу.
ЦIиб вузуз хъади аш шадвал
Филан гъюру женнетдихъ чру.
Йигъар апIураза гьисаб
Мюгьлетназ ккилигури жара.
Магьа рябкъюрайиз гъи саб
ЦIийивалиъ тIаъру чара.
ГьачIаккза Дугъахьна хилар
ГъючIюркьза ижмиди гъурдаъ.
Хиял гъабшиз: хътутIну тIилар;
Гюлйир арсну дишла гурдаъ.
Ав, сарун йиз бахт гъирибшвну
Писваларин ирк кьатI дапIну.
ГъутIу, хуку гурд улдубшвну
Дигиш'валариз рякъ хъябкьру.
Гъурдаъ аьгъдру Кьисмат айиз -
Му вуйкIан уьмриз саб чара?
Тяди ниъ капIуз ккундайиз
Уркъназа, рякъ адар жара.
Ухди гьялак машан, яваш,
Аьгь апIувал буржи ву йиз.
Хлиз рубкьдар гьязурди лаваш -
Чара уьбхюб ният ву йиз.
Жарадин кьисмат ккундарзуз.
Жараб ими, хъубкьна чара.
Ккарагуз давди аьгъдарзуз
Чара ими узуз жара.
ЧАРА
© Copyright: Рашид Азизов 2, 2016
Свидетельство о публикации №116100308640
Свидетельство о публикации №116100308640
Рецензии