ДАВА

 ДАВА

Дирихъган сягьнайилан кIуру гафар
Гъирагъдикинди чан, уьмри ктитунзу.
Йивурайганси далдабчйири дафар
Музмузари арайиз идитунзу.

Саб хилди иблисвалин четрикк ккаъну,
Имбударихъди зура мютIюгъ апIуз,
Гьюкум хлиъ айи агъа шерик гъахьну.
Амма пис кьуват гъурубкьундар ккагъуз.

Хъчвухури хъунти хъюхъяр, ккарагури
Гегь-гегьнак гъач дупнайи ккабинетдиз,
Гъахьну мичIли чарйир зухъди агури
Мяшат дарапIру чан гьярис ниятдиз.

КIул ккидривруб якьин гъавриъ ахъиган,
Хъюгъну гъирагъариз тарс бацар йивуз.
ЧIигънахъди ккагънайидар уч гъашиган,
ТтучIвну икрам апIрудариз дарсар кивуз.

Йисирарин улихь дивну месела:
Узухьна вуйи акушин ктIубшвруси.
ИтIихну тамам апIурушра фила.
Яракъ гъибису йиз тереф хъубшвруси.

"Агъайи" алаъну апIуз чан панзар
Дугъридарин машаригъ гъятIуз гъитру.
Узукра инсафсузди курччври зазар
Футна рабгъури узухъ саилар хъитру.

Узуз му бейгъушдиъ шлу дава имдар,
Халкьдин фагьум чахьна илтIибкIурухъан.
Йиз гележегдихъ дугъри уьмур хъимдар,
Давайиз чара Абгрур дихъурадруган.