Бягьсум

БЯГЬСУМ

Аьгь, кІваъ дердер утІукьнайи,
АпІуз даршули суза утІубччвуйи.
Сарихьанра жвув ккарцуз даршули
Табиаьтдихьна тІалабсуз гъушнийи.

Ачухъ аьтрафари йишвандин мучІу
Уьргънайи касдин шикил гьитІибкІуйи.
Дярякъди цІадлар улариан рузру,
Дахьру йишв адарди мягьрум апІуйи.

Шлиз ерхьурухъа уьргънайирин сузйир,
Жил, майдан хабахъ хъапІну дахънайирин?
ИчІи ву йишвандин сессуз гьавйир.
Дерднахъ хъчІаккру кас адар уьркърайирин.

Ипну а дердерин цІадлари гьюжат –
Гъянаъ гъудрузди, ужагъ гьюдюхюра.
ЮкІв дюбгъюз даршули, дубхьна хажалат –
Сузйирин гъагъишин жандик аьбгъюра.

Архаину йишвандин дифар али зав.
Сарин дерднакан хабар айибси дар.
Гьерхиш, фу-вушра кІурубси вуйи: – ав.
ГьапІнура сефилвал цІиб апІбанди дар.

Карахру гарцІлариин архар гъахьну,
Ккухьнайи хамриан цІадлари идирчну.
Уларихъишвар хъутну, бегьем гъяргъну,
Амма гьян сикин дар, цІин тІюрхъяр кидирчну.

Аьгьтлу Табиаьтра гъамлудиси а,
Вуйиган вушул сузйирин гьарай чахьна.
Насигьятарихъра бикардиси а,
Удудукьрашул, чарйир тина гьахьна.

Ккюгънайир кюмекназ ккилигурадар,
Жарабдикан ваъ – ялгъуз саб дидкантІан.
Ккаъруш чан ругарикккьан – жаваб адар.
Мич ктар жвув гьамци дархьбакантІан.

Дюргърин хътургурайирин нивгъар жили –
Машнан кІанакк майдниин даграр шула.
Удубдури чрушан хилари гьили,
Жандин рюгь душвлан дургуз гьялак духьна.

Гьич айиб адар фукьан ишурушра,
Шли язухъшнаъ аъру му «кафтар» гьарйир?
КІул буруздикан йивну уьбгъюрушра,
Кюмекназ гъюрур хьидар, мапІан жафйир.

ЧІякъри шула завлан гъафилдайи диф,
Хабарсузди ккадапІури ипни ваз.
МучІу бужагъар ккаъра аквну зяиф,
Хъубкьуз, сарин гъанаъ ади, кюмекназ.

ЦІиб ву саб ваз, гьубкІрадар дидин зяиф акв.
Убгурайи гъян дердерихьан ктІубшвуз.
Ккунду аьршариан Месигьдинра кюмек,
ЦІюмгъларихьди кІваз рягьятвал улупуз.

Дярхъюрадар ишурайирин дердер,
Хъубкьнашра завариан вари кьувват.
Сузайи гъян апІурайкІан дербедер,
Ягьсузари кипуб, слин гъяйи суфат.

ГьапІну, фу гъядябхъну табиаьтлугъдиз?
Шлин аьзиятназ гъаних каркар гъивну?
Гьаз вуш хул‘ан идитну алачугъдиз
Жан тикйир хьуз гъитну, хядариз тай шлу.

                ***

Агь диши, мусурмнар, хатІа аьгъдру,
Бул кьалушин гюзгдик кибчрайи кабцІуз.
Шериквалириз ичв кьимат хьибдар ужуб,
Хъарин мархьли кжабкбакан гьаз гучІдарчвуз?!

Сар иблисдин тегьер-ният дибисну,
Вари «хизан» – чиркин – улар адагъну...
Набши ичв аьгьт, дугъридариз идипу,
Сабдизра дилигди, Гьякь заан апІру?

Гъи гьюкум айирин канчІарикк,
Намус туври, Гьякь нягьякь апІурачва.
КкапІузди гьярам рягьят хиларикк,
ТІарашчйирилан гъефес бирхурачва.

Гъийин йигъаз гьаз аьгъю гъабхьундарчвуз
Жвуван угъраш жан багьа вуш, дарш – Намус?!
Буржлу шулачва улихь цІузар апІуз
Дугъхъан аьйиб бисури, ккеъну гьамус.

Коммунистар вуйчва, шликан асиллу
Нягьякь тереф дюбхну, ахту алабтІуз?
Къанун чIюбгъюри уставдин асуллу,
Дугъаз къаршурин ккачва мелз адабтIуз.

Сар улдучIвиш сягьнайиинна нагагь,
Гьякь кIурударин дердназ дава хьади
Думура батIул апIурчва ккабтну гагь,
Хил илдиривуз учв'ин хъа ражари.

ГъубкIрадар кьувват къаршу дийигъуз учвккан -
Дугъанра хлинццар лап ухди ктахьура.
КIул гъюнаригъ гъюбччвну чан эглюгиккан,
Дугъканра, хъасин футнийир ерхьура.

Фу бадали тIафал гьякьвалиъ вуш-дарш
Зат дициб кьиртI хъади дархьир хасият,
ГучIбу ктаурачва лайикь ватандаш?
Дугъан гьюкми учвуз ктрапIруган аьзият?

Бес ву ичв асас дудубгнайи ферзар,
ТIаай улар гьарсар сар сариз лигуз!
Аничв душваъ уларин ерина мерккар,
Аьхъюган эрцIури маниган аргъуз?!

Аргъай гъайсарди, гъит, сабан баладар,
Аьхъюди вушра аьгь апIарза зегьер.
Чан ругариз я жилира гъитрадар -
Гьялак дар, гьякь дивуз имишул мегьел!