Кьисматнан кьисмат

КЬИСМАТНАН КЬИСМАТ

Дархьи мисал ибшри йиз жандак,
лигухьа имбударин юкІвар фици шулуш;
вижна хьибдар,
я зарал-зиянвал,
я гьягья-шадлугъвал кІвак.
Гъузди гьамусдизси хъригъури харарси,
сифахъ дукІ гъюдубчІвну, абгури урхъ,
ясан цІаркь,
лигуз ккунди,
даршули,
кьисматариз.
Гьаци дарки чпин пай гьардиз дубхьну ккунди ккилибгури сиф‘ан гъушдариз
          рибшврурихъ ва сифазди ахьрудариз
ичІи шлурихъ.
Табиаьтдин хьидийи жара гьял,
белки гьарган ибшури – убгъури амс,
          даршсан пашманди яснаъ сасабгантІан дяляхъди – хътибтури диф.
Хиял дариз фици хьнура шлубси саб гьял –
гьапІрийи гъабхьундайиш йиз кьисмат? –
ИбчІрийи дархьи мисалси, вари, вари дюн‘яйиъ айиб, учв, дюн‘яра вариси, эгер, 
         хъана ихтиярсуз кІураза, узуси, вариси, дюн‘яси йиз кьисматра гъабхьундайиш пай,
тай,
хай жара гьялнаъ айи табиаьтдиз.
Хиял дарибшри саринра
узу йиз тяриф гъапІза кІури,
амма кьисмат гьациб дубхьнайиз:
тяриф ваъ, хъа таза кьисмат хъивруси.
Дархьи мисал ибшри саб жандак,
лигухьа имбударин юкІвар фици шулуш,
лигухьа: шул – ичІиди уьрушнахъ
кьисматнахъ хъугъвал хътрударин гьялакди;
рюгьсузди,
къурагь хъугъвалик миж ктарди хъригърударин архаинди,
вижнади.
Гьяйиф дарзуз гьялалди хъибшнайиб,
узузди,
йизубди, аьзиятлуди,
хусусисибди –
кІуру гаф дариз му: фикир ктарди гъузай
гъалабсузди,
гъургъушумдин тки рубкьайиз.
Кьисмат, фициб вушра уьмрихъ хъайи йиз
дайиштІан жвуваз гъияматдиз,
гьаддиз Табиаьтдин марцци ният гьаргандинуб,
аьгъю дарапІди чан сир Учв даккнидариз,
шуйкІан узуз – сардиз.
Магьа кьисматнан Кьисмат йиз,
узухъ хъибшнайиб вардиз.
Кади дидик Инсанвал айиз
капІну тяаьм мянфяаьт ктабгъуз гьардиз.