УСАЛ

УСАЛ

Рихшандчи – усал,
жям'аьтдин улихь,
ккуш таярин чан,
ккуш аьхюр-бицІирин.
Дугъу рихшанд апІуру
тІафалвалиинди
гьитІибкІури халкьдин
аьгъю даршлубси,
гъуллугъчи вуш –
кучІлин бикІбариинди
учв уччвуйи улупури
гъалатІ кадрубси,
шак дяргърубси,
адмийирихьан
кІубанвализ шерик шул
дидкан чаз хаир каш.
Хъасин партияйик кучІвур,
эгер дидик хайир дарш,
аьхю чІукІахъ тямягь хъади,
гьаз гъапиш
чан кІубанвали
тяриф, ад, аваза
эллеригъ гъазанмиш гъапІну
рихшанд апІури.
Дугъу чаз таяр
наънанушра
чарасуз агур
гужли хасиятнан
кІакІначивалиндар
гьам ляхнинси
гьам мучІмучІинна,
гъир‘ят паргари гъитрудар.
Думуган дурар
дугъан гафнахъ хъпехъур
аьгъю даршулди
фукьан пай, дурарик,
иблисвал,
гьярисвал,
дугъривал,
намусвал
каш аьгъдарди.

Гьаци усал
кІакІариз удучІвур
рихшанд апІури
дугъридар,
кІакІначйир,
гъуландар,
жикъиди,
гьялал зегьметкешар.
Дугъаз хъа гъурд абцІган,
гъал ккабцІган,
жан алабцІган,
хазна хъибшган
ккун шулу
инсанаригъна гъюдучІвуз
ва саб цІарнаъ дийигъуз
инсанарин фикраригъди,
ляхнарихъди,
гафаригъди,
гегь-гегьнак
апІури рихшанд
чаз гьякьяр кІурудар,
аьлхъюри –
ацІнайир,
гьуркІнайир.
Магьа
усал!
Учв улупури
девлет хъазухъ кІури,
дидихьнасан гъуллугъчи,
коммунист - динчи
рихшандчи,
имбудартІан
саб кІулди
артухъ
зиълансина
лигурайирси
мизмизариз,
цІимццариз
машнак кеъру,
ликрик кчІигру.
Кеишра,
кчІигишра
дурар
мизмизарна
цІимццарситІан
дайишт1ан!
Гьюкум халиъ а,
вари алдатмиш дапІна,
рихшанд апІур
ва ккун гъабшиш,
ахтусан алабтІур.
Магьа ихь усал –
ихь девриз гъафиб
агъзурна сар йисан.
Усал – игит,
игит – усал!
Усал – гьюкумдар,
усал – жаллатІ!
Хъа му усалинхъа?
Ав,
фицира
усал
гьялал зегьметкешарин улихь.
Рихшандчи –
усал
вари
инсаниятдин улихь!