Бюкме

БЮКМЕ

Сумчрариъ бюкме
ялхъвниъ айиган,
гъирибжюржюрин
булушкайин
кьул ккайи
юкьв абцІну
гьюжатнаъ шулу.
Адарди уьлчме
дишагьлийиригъ
дад хъимбударин
гъубшу суйнан
чпин вядйирин
арагури ханум-шагь
варидаригъян сар
хьуз падишагь
сумчрариъ бюкмейин
гъирибжюржюрин
булушккайин.

Бюкме
кьаби гъабхьну кІура
му вядайин шитлу,
назнази,
энтІи,
гъаргъу,
мичІлу
шубар-швушварин
фурсарин терзери
чпин гъахидариз апІру
ва
дархидариз курччвру.

Бюкме
йирси дубхьна,
хъа учу –
цІийи йифарси
йисандин цІийи,
кюкйирси
майдин аьлхъру.
Амма вахтну
дици кІурадар
ва
гьаммишан ухьуз кІваин алапІура
бюкме
гвачІиндин
хъитІирхбандин ахсрари
чан гъизил
гъирибжюржюрин
булушккайикк ккиври
дагъдин юкьвналансина
мяракайизди улар хътрукьру;
дифари
дидисну канчІар тІурччвруган
зарар ктахьури
кьяши
мяракайизди
чрушнариинна;
деркку-чІимру
дифарин ктахьу зарарикан
биржв апІури
бюкме али
ктабгъуз шубари
таза суй
чпин булушккйириккна
ккадру бюкме.