Астам

АСТАМ

Хаб-хабди йигъан дурчар хъчІюхюри хуз,
Чалачмиш шуйза – икриъ йирхьин дивуз.
Дадайин гафар ликрин кІанакк ккивуз,
Ич адашдин гьюрмат даршра ккундайзуз.

Аман гъабхьнийиз уьмриъ гьациб герен,
КтапІуз ккундаршра гьич саризра гиран,
Йирхьин ккудубкIну, гъахьну дурчар герек,
Я тахчигъ уьлин кьацІ гъядарди гъирам.

Аьхю мархьлин кьяляхъ кьяши ярквраан
Гъахиза шид гъизигу дурчар гъагъи.
(Гьациб вахтна гъерццдар агурва наънан?
Гьаддиз лазим вуйи йирхьин хьуб сагъи.)

ГьадатІну гьам дурчар уьлер утайиз,
Даршулди саб гужназ цІа тІапІза ттенниъ.
ЧІушар апІури аьхю чІвеъ гъургнийиз,
Амма бегьем цІийир гъашдар «шейтІниъ».

Мугагьназ тек-биртІан ишлетмиш дару
Гъи дадайиз чарасуз гъабхьи астам:
Дуржнайи уьлер ттеннин гараъ арсну
Ктагъуз даршули, карснайиси ву кьастІан.

Зиълан уьру буркьарси рякъюрушра,
АйтІан хамирди гъузу лап этІиди.
Хъургъри астам баклукар кчІягъюрушра
Гъузру кацІнухар узуз дайи энтІиди.

Артухъди ккутну, цІа дурубграйиган,
УьлкІерси ктучІву уьлер гизаф гъаши.
Гьаци идиргъдар рюкъяр-шюкьнариан
Баклукар дапІну, кивуз буржлу гъаши.

Гъи гьамус, ухьузра астмар чарасуз
Лазим дарин, ихь уьмрикан кцІахуз
ЭтІиди энтІи духьнайидар ягьсуз;
Шюкьни баклукар дапІну хъана кивуз.

Гъузну пну дурарин кацІнухар уьмрик
Баладар. Хъарин цІи чпи дургну ктахьур,
Эгер гъитиш бицІидари ттеннерик.
Ухьканра Сар хьидар гуннагь гъадабгърур.

Астам, хъана кІураза – чарасузвал!
Кьанди думу яракъназ гъадабгъайиз
Шулхьхьан ухди гьацдарин намусузвал
Дебккуз, духну дурчар мархьар ургъайиз.

Хаб-хабди йигъан дурчар хъчІюхюри хуз
Чалишмиш шуйза – икриъ йирхьин дивуз.
Адашдин гафар ликрин кІанакк ккивуз
Йиз абйир-бабар илчІигишра ккундайзуз.