Шахматар

ШАХМАТАР

Йипай, гъалиб фуж шулуш дурарик?
Агъдайчвуз? Я жаваб ктар заварик.
Гьаци сир уьбхрудар ву аьсрарик
Тамаша аьламатнан, шахматар.

МютІюгъ апІуз яв вари кьутабар
Ккун гъабхьиш, зигну чилишмиш‘валар,
Бихъдар ачар ккидикьиш китабар,
Жинивалин тамаша, шахматар.


Яв табиаьтдиъ учІвуз гъабхьнийиш,
Гьамусдиз уву шуйин яшамиш!
Фукьан узуз апІуз аьгъдарш аннамиш
Гьадмукьан саб аьгъязуз – шахматар.

Гизаф гъилицну пну хайир шулдар,
Аьлдяхърурихъ эргнайи юкІвар.
Учв дарди алишв‘ин гъузуз хьибдар,
Тамаша саб ккундузуз – шахматар.

Шубубан йицІишубуд йисан Карпов
Гъахьну шагь, хъуркьайиз ихь Каспаров.
Гьамус дурарихъ хъивну а Салов,
Кюгьне чпи вуйиган шахматар.

Инсанар тамарзуди айиган,
Кьяш ктру йигъандин гъайгъушнариккан,
МичІлишнахъси хяраъ йигъан ву гьан,
Фагьмин мядан абцІрудар шахматар.

Нягьякьвал ктабхъдар, я угъраш‘валар
АпІурайиган эллешмиш‘валар
Яв тамашайиин гьаъри вахтар,
Жигьилихъ гъир‘ят хъивру, шахматар.

Индияйин жиларилан гъариб
Дуфну, гьамусра адарчвуз кІалиб,
Жвуваз ккунибси, ухди хьуз гъалиб,
Уьмрик эверсюф кубзру, шахматар.

Тамашйир гизаф а гьарсаб бакар
Дидисну халкьдин гьар жюре гъатар.
Дураригъ келлейиз йивруб аквар
Тамаша саб багьазуз - шахматар.

ЛюкьяризтІан шулдар мютІюгъ дагълар.
Кюкйирин шагь ву роза бахтавар.
Узуз увутІан тIагъруб адар,
Тамашйирин тамаша, шахматар.