Дарсар

ДАРСАР

Йиз уьмриъ узуз киврайир дарсар
Мектебдиъ ужур мялимси дар сар.
Хъюгъназухъ ктибтури гьарсар,
Чпикан йиз яшарик каъри сарсар.

Дагълари кІура: – Инсан, кас масан,
Гъеерхьунвуз гъараху завар сан?
Гъидиргънийиз мухрилан селер-гъван,
Рябкъ увуз, шлиз вуш ккимиди а узкан.

Дагъ гъапиган узхьанра даршлуб а.
КапІарзавуз ккундуш йиз тяжруба,
Агь апІуз айи сабрикан зурба.
ЮкІв ади гъуз, душваъ узуз адруб а.

Кюкйири кІура: – Эй инсан. фукьан
Вуш аьгъяйвуз уч‘ин вари гьяйран?
Гюрчег вуча хаб балгури йигъан,
Гьяйифки, шлин вушра – мугъан, тугъан.

Кюкйир гъапиган машнаъ нур абхъру.
Назукваликан ич ккундуш бис бахт хру.
Аммаки, яв гъаврихъ гъуз, тум кабхъру
Авуз аьсрик: гьунар, учук ктру.

Мукьмари кІура: – Гьар наан ахъиш
Инсан фици хьнура шул дуламиш.
Дугъахъди гьенгер шула яшамиш
Гьам дагъдин, гьам багъдин кІваз бегелмиш.

Мукьмар гъапиган вари гьенгер дар;
Деллу шлудар, саспидарихъ хъпехърудар.
ТІалаб вуйиз увкан: гъит, гъузри мукьмар
Ккунди аьгь апІуз дердер, шадвалар.

Хядари кІура: – Аьршариъ ачуз
Жил‘ин дару азадвал чарасуз.
Фицира, инсан, саб гаф кІучавуз:
Яв заанвал пуч мапІан гьяйифсуз.

Хядар гъапиган, дар дурар заан
КІул кказабгну лигурушра лавлан.
Йип учузра: яв кІван гьиссар наънан
Гъазанмиш апІуз шулуш, эй инсан?

Адмийири кІура: – Дагълар вуйиш,..
Кюкйир вуйиш,.. мукьмар,.. хядар вуйиш,..
Хьибдайчуз яшайиш мициб бейгъуш, –
Агъя-аьгъдарди чиб-чпикан гьапІруш.

Хъана гьубкІрадар дурариз фу вуш,
Аьзиятнаъ юкІвар апІури буш.
Ккуниб имдар, тямин ву гъурулуш,
Саки кьадар ккундар гьарсабдин вуш.

РаббиИнсанди Чан кивразуз дарсар,
Йиз пчІу, кру уьмрик гъузруси сарсар.
Мектебдиъ адлу мялимси дар сар
Гъал ктарди кюмекнаъ азуз гьарсар.