СУЛ ВА СИЛ

СУЛ ВА СИЛ
(Басня)

Сил:
Швеъдинсиб саб мугъара хътарзухъ -
Ккунийдизуз убччвузкьан урхъ!
Духьнадайишра баладайзуз тухъ.
Уву, жан Сул, йиз гафарихъ хъугъ.

Сул:
Швеъ идипурза. Хал яв ву, Сил.
Хътабгъидива юкІв абцІну нефес.
Йизра увухьна саб гъуллугъ айиз:
Марцц апІин узухъ хъайи урсил.

Узу наан аш-адарш аьгъявуз.
ДарапІрур адар йиз адрар.
Эгер увуз ккундуш му гьявуз,
ТІиршидива йиз миркк али йирфар.

Сил:
Бахт ибшривуз! Рази вуза, Сул,
Увхъан марцц апІуз ниъ хъайи урслар.
Миркк илдипну хурзавуз асул,
Хал мани апІуз тувиш мурслар.

Сул:
Телефон апІурза масккуриз –
Мумкин хьибдар искалатчийиз –
Уркьиди увухьна закуриз.
НакьтІан дупназа харатчийиз...

Дугъу мюгькам апІидияв хал.
Узу гъапиб ликрикк ккивуз хьибдар.
Иливурвуз урчІарихъ ахал
Дярхри апІуз яв хъунти кІанччар.

Сил:
Кьюрид  гъардшари гъитІхьа йикьрар.
Хьибдар увук, узук киппуз шлур.
Кусри гъузур бюркью мизмизар,
Яв хьа, йиз гъидикь – магьа абур!