Телеграмма

ТЕЛЕГРАММА

Телеграмма гъафну Урусиятдиз:
«Хъуркь, аба гъакIну…» – кади чІуру хабар.
Хтулиз му кІваълан гьархдар гъияматдиз.
Дишлади гъяргъю дугъан ккуру табар.

Гьягъюз гъулаз гьялак гъаши хъади хпир,
Амма кбалгайиз дугъан гъабхьи гьир.
Гъузундар дугъахъ гъунши хабар дарпир,
Жвуван дерди вардиз апІури загьир.

Хъпехърударра фикрари гъадагъуйи:
«Фукьан жвуван аба гьяйифди дарин, –
Гьадушв‘ин кьиматарра адагъуйи, –
ГъакІи абин бай дарин фукьан дерин!»

Шубуд йигълан хтул аба кивну гъафи
Гъян убгури, жан дердери абцІнади.
КIару сакъли шархьал гъибису вари
Хиял апIин мугъан ккудубкIруб дар дерди.

Ва-а! Гьяфта дубшнадар, гъул’ан гъафир
Чан кьяппавалихъ хъана хъахъру шадди.
Гьамкьан ухди думу гьаз гъахьну гъафил
Дарш ху гъапIу гаф гъабхьнийкIан дугъан чапди.

Хтулиз телеграмма кабалгну бегьем:
ДатІнайи дугъаз абайин тягьнийир.
КкадабцІиди гьамус чан кІваъ айи бегьер –
Хъимдар сану учв йитІнайи багьнийир.

Гьелелиг юкІв ачухъ дубхьнадар дугъан.
Дердерин бицІи цІюмгъял ими мухриъ.
Хиял ву: «Абайихъди вахтра гъурбан
Дубхьну гьаргандиз убчІвну, – кІури, - накьвдиъ».

Дугъри телеграмма йивурхьа хтулиз:
ГъакІир аба дар, хъа иблис ву, кІури.
КІваинди гъибтри, рябкъиди чан улиз
Дигиш‘валар кьяляхъ дяргърудар вуйиб.