Дейдан

      


      ДЕЙДАН

Гьядисйирин шагьид,
Уьмурлугъдин илдан,
Увкан гаф пуз Рашид
Буржлу духьна, дейдан.

ПчІу сумчир шулушра
Гъарабх цІигъна, дейдан!
Кечмиш гъахьир ашра
ЦІигъ ебгну гъюбс, дейдан!

Машгъулатнахъди нуш
Гъазан ялхъвниъ аяв!
Кьасабрарихъди хуш
Гъарма убхьураяв!

Абайи чан саб йиц
Сумчриз гъубккну хтулин!..
Кафнахъди гъюри иц
Хъюлчар ахьу йигьгин!

Дейдан ву такабур
Му арайиъ артухъ –
Хруган вахтназ абур,
АцІруган фунар тухъ!

Сабкьан машкврар, милар
Дейдан дарди гъушундар.
Писди гъафи йигъар
Гаш кади гъитундар.

Гъяркъну дейдниз кІару...
Хъахьну дейднихъ шадлу
Ярхи уьмриъ дадлу
Гьядисйир тарихлу.

ГъапІну зегьмет диди
Дару мегьел харжи...
Элдиз ккунди миди
Чаз рякъ жараб гъабши...

Цалик кебхна дейдан
Лик ккадарди рукьан.
Сабдиз шубубдикан
Бала хъубкьну терсран.

«Саб лик, - кІуйи диди, –
Вуйиз шадлугъариз.
Кьюбпибра, – нач кади, –
Гъушу гъам йигъариз.

Магьа кІваин дарди
Жаваб пуз аьгъдарзуз:
Шубубпубдин дерди
Фу вуйиш бихъдарзуз.

Ккимбударикан саб -
Закуринуб вуйиз.
Гъубзу кьюбпи гьисаб -
Гъийин ччвурнахъ хъайиз.

Ккимдрубдин тарихдихъ
Накь гъушдар хъитІнайиз.
Мягьрум вуза гьаддихъ –
Тарих дудубгнайиз».

Дейдниинна гъафну
Гъийиз зат дархьи гьял:
Учв эйсийиз гьархну –
КубчІвиган вушул хъял...

Уьлюркъяйиз аржлар
Шулугъчйирин десте
Хъубкьну: гъиву кьусмар
Убцру дейдниз сифте.

Гьюжат гъябхъю чиб-чпигъ
Шлин кьусум гужлиб вуш.
ХъапIну душну, гъяригъ
Шли ухди штук кипруш.

Ликар гъивган дейдниз,
КІанакк ккайи аржлар
Гъарагъу гъирагъдиз
Багахь хьашра арчлар.

ЦІин хядарси тикйир
Заварикан ктахьганси,
Хъана шули парчйир
РачІур нафт кубзганси.

Алчгъариз тамаши
Арчларикан дайи.
КІваъ адарди Эйси
Саб дейднихъ хъергнайи.

Гъагъи хил хьайири
Дейдан гъюниинна
КьастІанси запІури
Ипуй жилиинна.

Хъасин бец гъапІу хил
Кдатуйи кагьликан,
Думура хьуз бахил
Пис ляхниз дейдникан.

Биргъура либкури
Чаз аьгъдру даккнишваз.
Гъванар–маргъар куркІри
Зат мялум дарушваз.

Зулмикк ккабхъу илдан
Аьхир мютІюгъ апІур.
Лик ккудубшву дейдан
Кумриин алабхъур.

ГьапІрачва, эй инсанар,
Илдан – дейдан уьбгъюри.
Вуячв дидкан фу хъюлар?–
Артухъ ликар кка кІури?!

Учвухъра хътарин ликар
Гьаддиккси шубуб беле.
Думгьа учвуз тувна маар:
Шубубпи лик ву келле.

ГьапІрава, эй инсан,
Дейдан тахсир вуйин?!
Фу хъюлар вуяв дидкан,
Келлейиъ маъ адарин?!

Агь учву нярсар, тарсар!
Дейднин ерин дерккуз
Учвкан кунду гьарсар -
Дидин гьялнак ккитуз.

Силис дару вахтар
Гъатху гъахьну дейднихь.
Халкьдин дидкан гьяктар
Кьаби ву ихь улихь.

Гьар заманайи чан
Гьякъи гъадабгъура,
Ккудубшу вахтнакан
Хай кайибра ктрубра.

Ккумриин ялгъузди,
Тарих лик ккадарди
Дейдан фукьан гъубзди
Сумчрин цІигъ гъядарди!

Илдан йивну гандриж,
Хилар гьачІаккрурик
Чахьна гъибтнади миж
Ккададархьру кка аьжликк.

Буш гъабхьнукІан илдан
Сикинсуз вядайиъ?
Гьаци шулкІан бирдан
Насларин юкІвариъ.

Йирси гъахьидар саб
Дар дейдан, гъазан, гъаб.
Адарди чпин гьисаб
Вари духьна хараб.

Йиз багъри аба–баб
Дейднин таяр духьна.
Ккунди жвувкан шараб
Саб ликрин кам духьна.

Чпихъ веледар хъади
Гьякь йисирар духьна.
Юкьуб тереф ади
Бахтар, мягьрум духьна.

Ккумриин ал учІру
Дурарин гележег.
Бихърубси дарда пчІу
Бахтнан тики гьелелиг.

ЦІиб кабаб, кар, гаш, кур
Гъахьну кІури дурар
Тахсир вуйин яш хур
Ухьухъ хьуб бахтавар?

Хъипнахьа дейднин гьял
Ухьуз багъридарихъ,
Алдабгъуз ккунди хъял
Бахтар гъяни шлурихъ.

Вахтар гьирифрурихъ
Жувкан гьюрмат дубгра.
Девлет хъирифрурихъ
КІвакан рюгьяр кургра.

Даягъ дар сабанра
Гьаци вуйи замана!
Жафа хур кьюбанра
Даршлуси зат хана!
            1988й.