Афият

Зи рикI алай манидар Афиятаз бахш яз

Гатфари цуьк ахъайнаваз, атирдин,
Билбилри шез, лугьузвалда манияр.
Къиметлувал чир тахьана къадирдин,
Де лагь вуна куьз хана кефи, кIани яр?
Дуьнья тирла - шадвални кеф-кефият,
Вучиз сефил хьанаватIа лагь, Афият?

Жегьил уьмуьр фена экуьн ярарин,
Рагъ акунихъ, цIигел хьана, вил галаз!
Зи гуьзелвал, чIулав бурма чIарарин,
Акуна заз, киферихъ ви гъил галаз.
Дуьнья тирла – шадвални кеф-кефият,
Вучиз сефил хьанватIа лагь, Афият?

Девирар къвез, алатзава йисарин,
Куьз чи бахтар ахварава ширин тир?
Муьгьуьббатди чин чIурнавай сусарин,
РикIера дерт туна хер яз дерин тир.
Дуьнья тирла – шадвални кеф-кефият,
Вучиз сефил хьанватIа лагь, Афият?

Сажидина манийриз ви яб гана,
НуькIрен рикI хьиз хъуткъунзава хуруда.
Акъвазизни хьун тавуна, таб гана,
Вилин накъвар авахьна зи чурудал.
Дуьнья тирла – шадвални кеф-кефият,
Вучиз сефил хьанватIа лагь, Афият?