Аьйнар. Басня

              АЬЙНАР
               (Басня)

   Къур дубхьнай вахтна чIурариъ,
Чпиз шид пай апIуз, нахшрари
Шттун кIулиин дебккру Фил.
     Варди кIуру: «Фил ву гьякьлуб -
Ляхин апIиди аькьюллу,
Хьидар хаин я гъафил.»

   Жандкиз дилигну - туври шид,
Фил вардин гъуллугънаъ гъабши,
Дюзди уьбхюри къанун.
   Гьяйванатар вуйи рази,
Адай дидлан апIруб аьрзйир,
Филин дустт хьайиз Маймун.

   Хъа Маймун, кьастт ади якьин,
Ихтибарнаъ убчIвру Филин,
АпIури игаг аьмлар.
   Филиз гафар кIури гъяни,
Дидин улариин Маймни
Иливуру чан аьйнар.

    Му йигълан Маймнин аьйнари
Филиз гьяйванатар вари
Улупуру бицIиди -
   Фили, «чIур дарапIри къанун,
Ва кIваъ гьиссар ади умун»,
Шид тувруганси цIибди.

   Аьйнари учв - Маймун угъраш
Улупуйи Филси гьич-дарш-
Маймун шлубси Филин тай,
   Вардилан дапIну кьяняаьт,
Хъйибгъу шид, ади мясляаьт,
АпIуз чиб кьюригъна пай.
-------------
   Сар гъахьиш саб гъуллугъниин
Вая халкьдин дакьатниин,
Дугъахъди шулу маймнар.
    Дицир касди - чаз аьгъдарди
 Вая вуйиган гъулайди -
УьрхюйкIан маймнин аьйнар?