БАД

        БАД
УчІвубгнамиди саб таза бад
Цци хьадукран йигъарикан сад,
ЧІибкІуйи демгилан кубкІну дад,
Гъазанмиш апІуз ккунди чаз ад.

УхдитІан бегелмиш дубхьнайи
Вахт, даттар пеэри хъапІрайи,
Аммаки нач ктар, гьялак дайи,
Бад демгилан илбицурайи.

Чвлин хуррам вахтнакан сад йигъан,
ГучІ‘вал, нач‘вал кидипну чакан,
Аьгьт апІур дибисну кІваин гъван,
Сад йигъ гьапІуз пеълин уьмрикан.

Даттарин уьъйирихъди вари
Ригъ гьудубчІвайиз уягъ гъаши.
Икриъ удар убдубси, гьари
Ул илтІибкІу хюндилан раши.

Хюнди кьяллан алдатури рижв
Убхъурайиган чичІлин бижван,
МикІру, бицурайи хъади чІвижв,
ЧІар гъебккурайи хюнд‘ин цІижан.

Пеэр илтІикІну бедрейилан
Кюмек апІурайи чпин хюндиз.
Мегьел саб бад демгиъ гъурдилан
Гашди ашра дуфнадайи икриз.

Дидин юлдшар гъварч жара бадар
Ухди дагриинна душнайи.
Му бад, апІурайиси аьдатар
Тахчигъ пеэриз хълибгурайи.

–Пеэри ккудубкІубси
Узура алабхъурза.
Узхьанра, мурта абхъси
Къакъйир пуз шулш лигурза.

Хъюбгъру бад саб муг‘ин алабхъуз.
Душв‘ан, кІикІлар ккайибси мухрикк,
Гьяракат апІур муртйир идирчуз.
Дидин гъюдгъюдкьан ккадар гъухрикк.

–Гъюргъиш чпи гъузур демгиъ,
Дяряркъюз алабхьур нихъ.
Узуз рягьят хьуз мукьаъ
Гъибтдизагьан жвилли сихъ.

Дугъридан бадли гьаци апІур.
Дидихьнасан, ккучІухну ликар,
Хъана чаз архаинди абхур
Ахинна леэф дапІну хлинццар.

          ***

Гъийин йигъкан хайлин вахтар гъуш,
Амма бадлин къюдкъюдар ерхьдар.
Учвра вуйибси пеэрси гъуш,
ФукІа артухъ жараб апІбак ктар.

Мугдилан, хлинццар тІурччвуз ккунди,
Сабпну ебгну ултІубччвурайиб
Абхъур, чархьнай муртйириинди
Ва кабцІур авали дубхьнайиб.

Аьхир пеълин гъиллигъар жини
Чахьан зат апІуз даршлуб аьгъю
Гъабхьиган, либкури, саб гьили
Шюхъси демгиан удубчІвур хъюлуб.

– Му фу гъабхьи йиз кІул‘ин
Давди гъадабгъну бала?!
ГъабтІунзуз уьмур пеълин;
Ккундарзуз мици валлагь.

Гъатхубдихьди даршнайи ликар
Диди тІагъруди диврайи.
Чан пейни алацІнайи зиквар
Жандик гъилгъларси керхнайи.

–Фу гьял ву уз‘ин алиб?
Гьаз тІагъруди дицуза...
Я гьамус дагрихъ хъайиб...
Вушра закур жибкІарза.

Дидиз раккарихь шибариин
Ккарабгъу таз гъябкъю шид ади.
ЦІиб уьргъми дапІнайиб эйсийи
Вуйи палтар урччуз гьязурдади.

–Пагь, узу закуризра
КацІну гъузуз кІурайда!
Гьярам шулин куризра
Му «дагриъ» жибкІуб арда!


Чан бегьем шад гъабхьи бад айтІан,
Яваш-явашди багахь шулу.
Фу лигур, учв исчІлиб ву тазтІан;
ГучІ ктар, гьапІнура ебгну убсру.

Сарун фу пузачвуз, аяллагь,
Бадру лизи тазраъ апІрудар!
Мициб дидиз даршлийи биллагь,
Бадси гъубзнийиш, ктарди фурсар!

Хлинццари апІури пячлучар,
Кчвурхури даргарикан бацар,
Гьич таз‘ан удубчІвуз шулдар
ЦІибди апІурадаршра бяцар.

Марцци шид вари кьалу гъабши.
Кьувватнахъ хъимдру бад уьлюбхю.
Дидин фурсар, дирбаш‘вал набши
Дагриин алибси ккядябхъю?

Саб тягьярилан хъуркьу эйси.
Думу бадлиин мюгьтал гъаши.
Адабгъну бад тазраан гъюрси,
Язухъ зигури ханжлиз гъабжи.

Гьякьди шлиз вушра шлуб гьамцибу
Бадсидариз, я закур, я гъи.
Уьмур кьалу гъабпІдар дарццибу.
ГъипІган ицциб вуйда бад ягъи!