Акьуна за ракъин нурар бейхабар,
Са легьзеда буьркьуь хьана амукьна,
Къакъатна руьгь хьана беден татабар,
Квахьна акьул зун дивана амукьна.
Са гуьзелдин акунри зун лаларна,
Килигунри руьгьни галаз т1аларна,
Чан Аллагь,зи вучиз ч1урна гьалар на?
Рик1ин къене цацар цана амукьна,
Амукьна зун са сегьрада къарих яз,
Куз ракъини зун ракъиник дарих я,
Амайди захъ цук1ар галай са руьхъ я,
Гьатна ялав зи чан кана амукьна.
Хиял къугъваз ашкъди ягъай макьамдал,
Хъуьрез эллер зун Межнундал - авамдал,
Йиф ацалтна зи шегьердал, Аламдал,
К1анида заз дердер гана амукьна.
Чи Муьшкуьрда гзаф хьайт1ан гуьзелар,
Анжах садаз кхьида за гъезелар,
Гьикьван эхда дердини гъиз ишелар,
Шагьмардан къе гуьгьуьл хана амукьна.
Амукьна
© Copyright: Шахмардан Арран, 2016
Свидетельство о публикации №116090609546
Свидетельство о публикации №116090609546
Рецензии