Абгури айза лич

     АБГУРИ АЙЗА ЛИЧІ

ГъючІюбкьну диф гъяйи
         гъюлягъ,
         гъяригъ,
         дагъларигъ.
Гъабши хябяхъдихъна амси
         убгъури,
         зазси,
         заъланси.
Ктайи мичІлишин гьавайик
         аргъру,
         амкІлу,
         микІлу.
Вушра рабсуйи ручІ
         кушарик,
         кюлерик,
         сиварик.
Абгури айза личІ
         дарфиб,
         рашиб,
         кІубниб.
Гъафнийи вари лиж
        гъулан
        чІурдлан
        ухдитІан.
Наан абгуру личІ гьамус
        мучІуди,
        гучІуди,
        чІучІуди?!
Чекмийир кьяши духьнайиз
        укІаригъ,
        рукаригъ,
        зуртІаригъ.
Айиб адар, юкІв хъайиз
        гъулахъ,
        пичрахъ,
        швякьярихъ.
Хътакза хулаз дибрихъруган
        жилгъайиъди,
        машарикди,
        чки-чкиди.
Икриъ адаш дийигънайи
        ккилигури,
        архаинди,
        инчІлуди.
Дугъу гъапизуз хъуркьайизра:
        – Чухсагъул!
        Валлагь
        Маншаллагь!...
Дугъан зарафатнан гъавриъ гъашиза
        кьандиси,
        заандиси,
        айтІандиси.
Хябяхъдин малар гъюбси
        адашди,
        чуччу,
        гъардши
ЛичІ узхьан гьитІибкІну
        ахъихъ,
        эплихъ,
        арчлихъ,
Аьгъю апІуз ккунди
        кІубанвал,
        кьугънагвал,
        гучІрувал
Йиз хасиятнак кади
        жиниди,
        кІвахъниди,
        гъубзнайиб.
Иштагьлуди деиган цІикбарихъ,
        адашди,
        гъардши
        гъаписи:
Узкан сарун жви ктучІвнийи
        гъайгъуллу,
        гъулайлу,
        гъалабугълу,
ГъючІюбкьну диф гъяшра
        гъюлягъ,
        гъяригъ,
        улчІвмаригъ,
Инсанвалин лишнар уьрхрур
        гъулаъ,
        гъянаъ,
        хянаъ.
Адашдин кзибгру дарс
        накьра,
        гъира,
        закурра,
КІваълан гьархрадариз думугандин
        абурлу,
        вердишлу,
        зарафатлу.
Аза сяргьятариъ гьаддин
        кьюрдуккдира,
        гьиссариъдира,
        йисариъдира.