ЯС

Гьаму гъабхьи гьядиса ву
ва думуган узура душвахь хьайза,
магьа узуз гъябкьюб ва гьадмуган гъибикIуб:

ЯС

„Зат тарихариъ дархьи къазават гъядябхъну касибариз...“
„Мегьел, мукьан халкь саб йишв‘инди гъирмиш гъахьундайи...“
„Ай Аллагь, фу бадали Табасарандиз мициб мусибат гъядябхъну...“
Гьамцдар ва жара кІваъ гьитІикІну гъитуз даршлу гафар ибариз ерхьури шулу. Ва, филадизкьан?..

«...ихь радиойихъан гъеебхьунзуз. Гьадмуган, аьгь апІуз даршиди, уларилан нивгъар диргъуз хъюгънийиз ва гьарайра тадабхънийиз...» – сари чан дерд узукна ктибтнийи. Дицир думу сар дайи...
Йипай, фици кІваълан гьаъхьа му «шиклар»...

Хиларигъян журужси гъючвюхюра
«Ургудварж манат» дибикІнайир ягълухъик.
Ламун майдандикан ликар кутІурччвура
Удубзурайи ифди кьяши шлурихъ.
Кушаригъян гандриж али сим гъибиржна,
Узак кудучІвнайи укІарихъ хъабсри.
Дугъан кІул, унтІ, маш - вари ифди дибиржна,
Гъачархьушвариъ дисру кІару ликІарси.
Аьзабнакк ккахънайири гьарйир апІура:
«Кушар хъарсри келле алдабгъурайиз...»
Улар мучІу, йиз юкІв юкьуб парчи шула,
Мугъан гьарйирихъ чан багъридар хъуркьайиз.

Гьадмуган узуз, йиз узу вуди гьугъужвундарзуз, гьаз гъапиш, гъюрдаригъди йихурайидар улариз рякъруган, жвуван беденра гьаци дачабхьну исихъ дипнуси гьугъубжвуйи. Гьугъубжвуйи жвув кьюб пайназ жара духьнайиси – саб пай, ичІи жан, гъирагъдиз хъалхъамси гатІабхьнайи, гьатмунубсана – кІул‘инди, гьаваси гъилибжурайи фагьум, рюгь...

Малар урккурайиринси хилар дарснайиз
Халкьарин ифйир каркаризди рузури.
Уларигъ нивгъ гъядарди къурагь духьнайиз
Йихурайидаризси кьяшшан гьудрубкІри.
КІарбар дюргъну, шлин кІулин маар итІигъна...
ЦІигъ чубхурайи хамси юкІв чибгурайиз.
Ай эллер, гъи гвачІнин узуз фу рябкъюра...
Пуз шулдарзухьан вари рябкъюрайиб:
Ихь фагьмихьди бикІуз шлу шикил дар.
Гъитай, (МапІан узкан сабанра аьйиб)
Аьхириз хътипІруси йиз юкІв цІицІиб – цІицІиб.

ЧІивидар машинаризди гъахурамиди хилариин йихурайиган, жвуван уьмур швнуб-сабан хътубтІнийиз... Гъачархьдаригъян ил алми кІурудар гъюдюхнийча... Фтикан улхурава, эй Рашид?!.

Завар гъарахну, кІури шулу, гъябкъдари,
Дагълар тІуркІури жилариинна ахьри.
ЦІин мелзар аьзабнан шул, кІуру гъургдари,
Улариз гъяркъган инсанар чюлиъ дахьри.
Гизафдар талаф гъапІну дицдар дявйириъ
Сарин уларикк кьюр, хьур, йицІур... йихури.
Мидиз фу кІухьа, дяви адар мушвариъ,
ЙирхьцІурариинди инсанар чархьури?!
Дариъ ахъу аьжузарин сан-гьисаб адар –
Садар улариз вари аьзаб рябкъюри.
Гьергу рюгь кІвахьан жара апІуз шуладар,
Гьендемарикан кІван дамарар кдутІури.
Агь, табасарандиз гъамлу юкьубпи май,
Ич кьадар гьадмукьан аьхюди гъябкънийвуз?
Шадвал бицІи халкьдиз дайин дарш хай?
Аьжузариз айи дердер цІиб дайдучуз.

Ухьу варидари, миржцІурна юкьур кас ади абхъу автобусдиан гъийиху къанна йирхьур касдин яс кІваъ уьбхюри, гъачай, ихь ктучІвру тІулариин сацІиб швумал хьухьа, аьжузарин язухъ зигухьа, ихь юкІварин манишин ва масанвал гьарсари сариккьан кубкьуз гъитхьа.