Уьмрихъди духьнадарза гюрюшмиш

УЬМРИХЪДИ ДУХЬНАДАРЗА ГЮРЮШМИШ

Марцци нурарихьди йиз уьмрик капІрайи накьиш
ГъапІундарзуз табиаьтди ккарагурашра таниш.
Таза мукьмарихъди, йиз рюгь апІурайи утармиш,
Хасият гьиссариъ ашра, духьнадарза гюрюшмиш.

ТІалаб дару дердер сефил жандиъ шулайиз дигмиш.
Аьгъдарзуз, тахсиркарди йиз аба-баб гъузну имиш.
АмкІун литІнарихъди йиз унтІлан шулайи расламиш,
Диб, метлеб аьгъдарди духьнадарза сабан гюрюшмиш.

Васиятар гъапІну бабари, хал – хизан апІру динж,
Аьгъяди гъюз имбу гележегдин гьякь рякъ ва ериш.
Гьаз ккивза ликрикк дурарин акв, ктІубшвган касди надинж,
Фициб тяаьм гъюруш даршиди сацІибкьан гюрюшмиш?

Фтилан ккебгъза, цІийикІултІан апІуза башламиш?
Улариъ ачмишдайи тІябат шулдарзуз къанмиш.
Аьзиятар адарзуз, буш гирнар апІураза саймиш –
Ихтият ккуни уьмрихъди духьнадарза гюрюшмиш.

Ахсрар гъяри - гъюри шулу  – ву гьар вахтна чалишмиш.
Завар - гьюлериъ сикин дарди убхьура яшайиш.
ЧІеишин, чрушин, хядар таза баштІан шулу артмиш,
Мегьел йиз ялгъуз уьмрихъди духьнадарза гюрюшмиш.

Сефте кІул’ан вахт вуйи гьядисйир апІру аннамиш,
Бабан хлинццикк ккимиди, хилиъ иврамиди йимиш.
Ккундарзуз вари хъайи-хъайибси апІуз ахтармиш,
Жинди сир уьбхру уьмрихъди духьнадарза гюрюшмиш.
I988