Тютю гъушракан

         ТЮТЮ ГЪУШРАКАН

- Тютю гъушру
гьапIуз чIигъар апIура?
- Диди, чазра
семечкйир ккундиз, кIура.

Бажийи
уьл ипIурайи устлиин
Дидизра дахьну
удрар ригъдин кюкдин,

ТIибхну, дуфну,
либгури чаз фу кIуруш,
Ккахьу удрар
удуз хъюбгъну тютю гъуш.

Хъасин диди
гъабрак кучну гъямгъямар,
Муччврин рижв бисури,
гъапIну гъягърямар.

«Чай» дибикIнайи кьутдиъ
фу аш хълибгуз,
Дюд резинси ктирфну,
зади кIул забгуз.

Аьгъю апIуз
фицдар вуш гъяфатна кIаж,
Гъямгъмиинди
шутIмар гъапIну шубуб раж.

Хъасин диди
пулар гъапIнийи гьисаб,
Хъийигънайдар
буханка гъадабгъган саб.

ГьачIабккнайиб
гъямгъямар йивуз нисуз
Хътабкний, дебхьну
чIигъ: «ГьапIрава, аькьюлсуз?»

Гьелбет, мициб нис
дидин къефсиъ айи -
Сарди думу ипIуз
иштагь шулдайи.

Бажийи таза уьл
тувуз хъюгъган чаз,
ИнтIи дубхьну,
сабан кьацI гъивний тIубаз.

Хъюбгъган думу
ебцуз ягълачайин гъагъ,
«Бябрям-дядрям» -
абхъний жил`ина гъапагъ.

Гьебгну тютю…
Гъабч кIурашра, гъафундар.
Диди чIуру гъапгъикан
гъапIну хъюлар.