Жакьвна чирккв

                ЖАКЬВНА ЧИРККВ
 
    Пеэр айи чализ*  удар убдуз гъюри вердиш дубхьнайи гъуланжакьвли му ражну чахъди чан чиркквра хъади дуфнайи. Жакьв учв ипниб ва дириб, хъа чирккв дадатIан гъабануб ва тIагъруб вуйи. Чиркквлин зиквар гъазаргдар вуйи -,белки, гьаддиз думу чIатхуди рябкъюрайшул. Жакьвли, пеэр-шюхъярихьиндира ул йивури, ккабхьнайи удрихъди жилиин дабхънайи уьлин кьацI гъубду ва, чики-чикиди дубшну, чав ктубдуб чаз ккилибгури гъирагъдиъ гакIвлиин дубснайи чирквлин ушвниъ иву. Гьаци жакьв, чIвегьентийин кIекIелси тяди, швнуб-сабан уьлихьна - уьлхьан чиркквлихьна гъубшу. Диди гьар ражну чиркквлин ушвниъ ивуз ипIруб гъабхурайи. Хъа чирккв, дадайи дубхну уьл фила чан ушвниъ ивруш ккилибгури, дийибгънайи. Дидик гьяркат анжагъ дадайи чахьинди ипIруб хругантIан кабхъурдайи. Аьхир саб пеъ жакьвлихьинди гъажабгъу, йивуз ккайиб вуш аьгъдар дарш фу-вуш пуз ккундайиб вуш.  Белки, дидиз жакьвлиз, яв чирккв аьхю бай ву - думу увхьанзинара гьитIибгъна, гъит диди, дуфну, увухъди сабси чаз уьл чав кудубдри, пуз ккунди айишул. Амма жакьвлизра, чиркквлизра гучI гъабхьи, ва дурар, парр дапIну, дитIирхну гъушу.



*Чала- пеэриз вая ччилар-кIарариз арчлихьди гьадабтIнайи йишв.