Са шеъни

Куьтях хьана зи шиирар, куьтях хьана к1анивал,
Азабдилай, тек т1алдилай гъейри амач  са шеъни.
Куьтях хьана чи жигъирар, амукьна са хаинвал,
Рик1ин къене са халдилай гъейри амач са шеъни.

Шумуд шиир зурак1 хьана амукьна зи кагъаздал,
Гъиз хъжезмач са рифмани кутугарна тараздал,
Кхьидач за гьич са ц1арни ашкъ галачир аваздал,
Илгьам пери кьена, квахьна руьгьда авач са шеъни.

Бедендавай  вири т1алриз эх ийида итим хьиз,
Руьгьдин т1алди ажузарна гишин хьанвай йитим хьиз,
Ужуз хьана зун зу вилик, рик1и тазвач йигин физ,
Хуш легьзеяр ахвар хьана ц1рана кумач са шеэни.

Рик1ин суза, рик1ин гьарай и алемдиз чк1изва,
К1анид хьанач, къайид хьана, кьисметди зун рекьизва,
Ц1ай хьана ам зи вилерин, гьиссер ргаз ифизва,
Фикир катна ярдин патав заз аквазвач са шеъни.

Алахьна физ уьмуьрдикай  зерре-зерре ст1алар,
Акъатзава ч1улав рик1яй ашкъидин ц1ай хтарар,
Муьгьуьббатди икьван инсан ийида жал усалар?
Гъиливайни, рик1ивайни ийиз жезмач са шеъни.