ХЪФИЗВА ЗУН МАД КИРИГИЗ
Хъфизва зун мад Киригиз.
Хъша лугьуз, эвер ганва.
Заз ак1 жезва, аялдик хьиз,
К1вачерик зи звер ктканва.
Цигел я кьван, лугьуз тежер,
Хайи хуьр я,- бинедин пун.
Алем вичин женнет тегьер,
Авазрик ква Кьулан вац1ун.
Т1ал -квал квайбур ят1ан рекьер,
Гьиссзава жув лап хъсандиз.
Къачуна герек паяр - шеъер
Хъфизва зун са мугьман хьиз.
Дуьз я, хъфин четин я заз,
Туштани зи мензил яргъал.
Часпар ава сятералд таз, -
Тартиб кутаз, ийиз скьал.
Сятни зуран мензилдин рехъ,
Мажалдивай зур йикъан вахт
Къакъудзава, яру жез хъвехъ,
Ифиндик кваз ... гьахьтинди я бахт.
Рекъелайни элкъвез к1андач,
Элкъуьн ажузвал я хьи мад.
Галат хьурай чанни, кьве к1вач,
Агакьда зун я геж, я фад.
Рекъин азабриз яб тагуз,
Шад гуьгьуьлди чан лигимриз,
Эвергуникай лезет къачуз,
Хъфизва зун мад Киригиз .
***
© Copyright: Фикрет Хидиров, 2016
Свидетельство о публикации №116081710249
Свидетельство о публикации №116081710249
Рецензии