Мурад тир хва ахкун садра

Салам хва, вахъ вил хьанва зи
Диде рикlел аламан ви?
Бес вуна куьз зенг ийидач?
Са чар кьванни заз кхьидач?

Зи гьалар лап пис я хьи, пис
Зи эхир за ийизва гьисс.
И мукьвара геж тавуна
Хъша чан хва свасни кьуна.

Салам салам, азиз Диде
Агъзур кlвалах ава гъиле.
Са арадлай зенгда за ваз
Кlвалахдик ква жезвач рахаз.

Са шумуд югъ алатна
Дидедин пак рикl акъатна.
Мад зенгзава хьи шегьердиз
Зенг хъийида лагьай хциз.

Салам зи хва гьикl ава вун?
Гишин яни, тух ян руфун?
Зи вил хьана зенгинал ви,
Кlвализ къведай рекlинал зи.

Зи гьал акьван хъсанзавач
Заз килигдай инсан авач.
Текдиз хуьре ялгъуз я зун
Зал кьил чlугваз мус хкведа вун?

Салам Диде захъ авай сад
Зенг авунал зун хьана шад.
ВАЛЛАГЬ, рахаз жезвач завай
Кар куьтягьин гъиле авай.

Няниз кlвализ хъфейла зун,
Мажалдивди рахада чун.
Ахпа дердер ахъая заз
За куьмекда чан Диде ваз.

Дидедин гаф сиве амаз
Лугьур гафар рикlе амаз.
Телефон ада хкудна
Вичивай яргъаз къакъудна.

Дидедин рикl тlар хьана хьи
Эхиз тежер кар хьана хьи.
Мурад тир хва ахкун садра
И кар патал зенгнай къадра.

Вичиз тек пуд югъ амайди
Духтурди и кар лагьайди
Лугьуз хьанач авай хциз
Тlарвал ганач адан рикlиз.

Лагьай пуд югъ алатна хьи
Диде чавай къакъатна хьи.
Гатфарин са экуьн кьиляй
Ахъа хьана Диде гъиляй.

Кlвалин юкьвал вилер ахъаз
Ала Диде кафандик кваз.
Арадилай са ракlарай
Хва хтан къуншид хабарай.

Вилин накъвар тежез илив
Хва атана Дидед кьилив,
Дидед чинлай чlугуна гъил,
Кьве къуьнуьхъди юзурна кьил.

Ишел къене хьанач хьи кьаз,
Свасни ава метlер гатаз.
Гьарай-вургьай квез я гила?
Гьай тагайла чан аламаз?