Аманат яз хвена кlанда шикилар,
Руьгьеризни тахьуй лугьуз фикирар.
Яраб уьмуьр я жал чи им фейиди,
Аквада жал лугьуз жуван багъриди.
Катна фейи ахварар я уьмуьрар,
Къекъвейтlани жагъидач а жигъирар.
Авуртlани хажалатар,фикирар,
Ишейтlани гьат хъийидач факъирар.
Диде,валай авач гьич мад багьади,
Жувалайни язух ава бубадин .
Вун эвездай кас алач заз чилерал,
Рикl цlразва,нагъв ала зи вилерал.
Ичlи хьанва кlвални,хуьрни,дуьньяни,
Катна фидан жуван хайи хуьряйни?
Крар къвезмач жуван субай гъиляйни,
Дерди жуван низ ахъайин,диде чан.
Йисар фенва амачиз вун дуьньяда,
Бубадизни амач кьарай,лагьайтlа.
Женнет кьисмет хьурай ваз а дуьньяда,
Виридалай зи кlани тир,диде чан.
Диде
© Copyright: Марьям Алискерова, 2016
Свидетельство о публикации №116073106887
Свидетельство о публикации №116073106887
Рецензии